ಭಟ್ಕಳ:ಪ್ರಾಥಮಿಕ ಶಾಲೆಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಸೇವಾ ನಿರತ ಪದವೀಧರ ಶಿಕ್ಷಕರನ್ನು ಪದವೀಧರ ಶಿಕ್ಷರೆಂದು ಪರಿಗಣಿಸುವಂತೆ ಕರ್ನಾಟಕ ರಾಜ್ಯ ಪ್ರಾಥಮಿಕ ಶಾಲಾ ಶಿಕ್ಷಕರ ಭಟ್ಕಳದ ಘಟಕದ ವತಿಯಿಂದ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ಸೋಮವಾರ ಮನವಿ ನೀಡಲಾಯಿತು.
ಈಗಾಗಲೆ ನೇಮಕಾತಿ ಹೊಂದಿರುವ ಪ್ರಾಥಮಿಕ ಶಾಲಾ ಶಿಕ್ಷಕರು 1ರಿಂದ 7ನೇ ತರಗತಿಯವರೆಗೆ ಬೋಧಿಸುತ್ತಿದ್ದಾರೆ. 2005ರಿಂದ 8ನೇ ತರಗತಿ ವರೆಗೆ ಬೋಧಿಸುತ್ತಿದ್ದಾರೆ. ಸೇವಾನಿರತ ಪ್ರಾಥಮಿಕ ಶಾಲಾ ಶಿಕ್ಷಕರು ವಿವಿಧ ಪದವಿ, ಸ್ನಾತ್ತಕೋತ್ತರ ಪದವಿ, ಮುಂತಾದ ವೃತ್ತಿಪರ ವಿದ್ಯಾರ್ಹತೆ ಹೊಂದಿದ್ದಾರೆ. 25-30ವರ್ಷಗಳ ಸೇವಾನುಭವ ಹೊಂದಿದ್ದರೂ 19-05-2017ರ ವೃಂದಬಲ ಆದೇಶದಂತೆ ಪ್ರಾಥಮಿಕ ಶಾಲಾ ಶಿಕ್ಷಕರಿಗೆ 1ರಿಂದ 5ರ ವೃಂದಕ್ಕೆ ಸೇರ್ಪಡೆ ಮಾಡಿ ಅನ್ಯಾಯ ಮಾಡಿದ್ದಾರೆ. ಇವರನ್ನು 6ರಿಂದ 8ರ ವೃಂದಕ್ಕೆ ಸೇರಿಸಿ ನ್ಯಾಯ ದೊರಕಿಸಿಕೊಡಬೇಕು ಎಂದು ಕ್ಷೇತ್ರ ಶಿಕ್ಷಣಾಧಿಕಾರಿ ಎಂ.ಆರ್ ಮುಂಜಿ ಅವರಿಗೆ ಶಿಕ್ಷಕರು ಮನವಿ ನೀಡಿದರು. ಈ ಸಂದರ್ಬದಲ್ಲಿ ದುರ್ಗಾಪರಮೇಶ್ವರಿ ಕಮಿಟಿ ಅಧ್ಯಕ್ಷ ನಾರಾಯಣ ದೈಮನೆ, ಕುಮಟಾ ಡಯಟ್‍ನ ಹಿರಿಯ ಉಪನ್ಯಾಸಕ ದೇವಿದಾಸ ಮೊಗೇರ, ಬಿಆರ್‍ಸಿ ಯಲ್ಲಮ್ಮಾ, ಶಿಕ್ಷಕರ ಸಂಘದ ಅಧ್ಯಕ್ಷ ಶಂಕರ ನಾಯ್ಕ, ಪ್ರ.ಕಾ. ಗೋಪಾಲ ನಾಯ್ಕ, ಉಪಾಧ್ಯಕ್ಷ ಚಿದಾನಂದ ಪಟಗಾರ, ಎಂ.ಡಿ. ರಫೀಕ್, ಎಂ.ಎನ್ . ನಾಯ್ಕ, ಮೋಹನ ನಾಯ್ಕ, ವಿಲ್ಸನ್ ರೋಡ್ರಿಗೀಸ್, ನಾಗೇಶ ಭಟ್ ಸೇರಿದಂತೆ ಇತರರು ಇದ್ದರು.