ಮಂಗಳೂರು :  ಅಧಿಕ ಮಳೆಯಿಂದಾಗಿ ಪಡೀಲ್ ರೈಲ್ವೇ ನಿಲ್ದಾಣದ ಬಳಿ ಗುಡ್ಡ ಕುಸಿತವುಂಟಾಗಿದೆ. ಘಟನೆಯಿಂದ  ಬೈಪಾಸ್ ರಸ್ತೆಯ ರೈಲ್ವೇ ಹಳಿ ಮೇಲೆ ಭಾರಿ ಪ್ರಮಾಣದ ಮಣ್ಣು ಬಿದ್ದಿದ್ದು, ರೈಲು ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿದೆ.

ಈ ಭಾಗದಲ್ಲಿ 15 ಮೀಟರ್‌ ಎತ್ತರ ಹಾಗೂ 50 ಮೀಟರ್‌ ಉದ್ದ ಗುಡ್ಡ ಕುಸಿದಿದೆ. ಮಣ್ಣು ಬಿದ್ದಿರುವುದರಿಂದ ಮೈಸೂರು - ತೋಕೂರು - ಪಣಂಬೂರು ಮೂಲಕ ಹಾಸನಕ್ಕೆ ಸಂಚರಿಸುವ ಬೈಪಾಸ್ ಲೈನ್‍ಗೆ  ಅಡ್ಡಿಯಾಗಿದೆ. ಕುಸಿದಿರುವ ಮಣ್ಣು ರೈಲ್ವೆ ಹಳಿಯನ್ನು ಸಂಪೂರ್ಣ ಆವರಿಸಿಕೊಂಡಿರುವುದರಿಂದ ಕೊಂಕಣ ರೈಲ್ವೆಯಿಂದ ಹಾಸನ, ಮೈಸೂರು, ಬೆಂಗಳೂರು ಕಡೆ ಸಂಚರಿಸುವ ರೈಲುಗಳಿಗೆ ತೊಂದರೆಯಾಗಲಿದೆ.

ಆದರೆ ಪ್ರಯಾಣಿಕರ ರೈಲು ಸಂಚಾರಕ್ಕೆ ಯಾವುದೇ ಸಮಸ್ಯೆಯಾಗಿಲ್ಲ. ಕಾರವಾರ - ಬೆಂಗಳೂರು ವಿಶೇಷ ರೈಲು ಮಂಗಳೂರು ಜಂಕ್ಷನ್ ಮೂಲಕ ಸಂಚರಿಸಲಿದೆ ಎಂದು ರೈಲ್ವೇ ಇಲಾಖೆ ತಿಳಿಸಿದೆ. ಕಳೆದೆರಡು ದಿನಗಳಿಂದ ಉಡುಪಿ, ಮಂಗಳೂರು ಸೇರಿ ಕರಾವಳಿ ಭಾಗದಲ್ಲಿ ಭಾರೀ ಮಳೆಯಾಗುತ್ತಿದ್ದು, ಗುಡ್ಡ ಕುಸಿತಕ್ಕೆ ಪ್ರಮುಖ ಕಾರಣ ಎನ್ನಲಾಗಿದೆ.