ಜೂನ್ ೫ಕ್ಕೆ ಕೇರಳದಲ್ಲಿ ಮುಂಗಾರು ಆಗಮನ

Source: sonews | By Staff Correspondent | Published on 15th May 2020, 9:55 PM | National News |

ಹೊಸದಿಲ್ಲಿ: ಸಾಮಾನ್ಯವಾಗಿ ಜೂ.1ರಂದು ಕೇರಳವನ್ನು ತಲುಪುತ್ತಿದ್ದ ನೈರುತ್ಯ ಮುಂಗಾರು ಮಳೆ ಈ ವರ್ಷ ನಾಲ್ಕು ದಿನಗಳಷ್ಟು ವಿಳಂಬವಾಗಿ,ಜೂ.5ರಂದು ರಾಜ್ಯವನ್ನು ಅಪ್ಪಳಿಸುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ)ಯು ಶುಕ್ರವಾರ ತಿಳಿಸಿದೆ.ಈ ವರ್ಷ ದೇಶಾದ್ಯಂತ ಸಾಮಾನ್ಯ ಮಳೆಯಾಗಲಿದೆ ಎಂದು ಅದು ಹೇಳಿದೆ.

ಕೇರಳಕ್ಕೆ ಮಳೆರಾಯನ ಆಗಮನದೊಡನೆ ಜೂನ್‌ನಿಂದ ಸೆಪ್ಟೆಂಬರ್‌ವರೆಗಿನ ನಾಲ್ಕು ತಿಂಗಳ ಮಳೆಗಾಲ ಆರಂಭಗೊಳ್ಳುತ್ತದೆ.

ಬಂಗಾಳ ಕೊಲ್ಲಿಯಲ್ಲಿ ಚಂಡಮಾರುತ ರೂಪುಗೊಂಡಿರುವುದರಿಂದ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಲ್ಲಿ ಹೊಸದಾಗಿ ನಿಗದಿತ ದಿನಾಂಕವಾಗಿರುವ ಮೇ 22ಕ್ಕೆ ಆರು ದಿನಗಳ ಮೊದಲೇ ಅಂದರೆ ಮೇ 16ರಂದು ಮಳೆಯಾಗುವ ಸಾಧ್ಯತೆಯಿದೆ. ಕಳೆದ ವರ್ಷವೂ ಆಗಿನ ನಿಗದಿತ ದಿನಾಂಕವಾಗಿದ್ದ ಮೇ 20ಕ್ಕೆ ಎರಡು ದಿನಗಳ ಮೊದಲೇ ಮೇ 18ರಂದು ಈ ಪ್ರದೇಶದಲ್ಲಿ ಮಳೆಯಾಗಿತ್ತು. ಆದರೆ ಮಂದಗತಿಯ ಚಲನೆಯಿಂದಾಗಿ ಅದು ಕೇರಳವನ್ನು ಜೂ.8ರಂದು ತಲುಪಿತ್ತು ಮತ್ತು ಜು.19ರ ವೇಳೆಗೆ ಇಡೀ ದೇಶವನ್ನು ವ್ಯಾಪಿಸಿತ್ತು.

 ಈ ವರ್ಷ ಐಎಂಡಿಯು 1960ರಿಂದ 2019ರವರೆಗಿನ ಅಂಕಿಅಂಶಗಳನ್ನು ಆಧರಿಸಿ ದೇಶದ ವಿವಿಧ ಭಾಗಗಳಲ್ಲಿ ಮಳೆ ಆರಂಭಗೊಳ್ಳುವ ಮತ್ತು ಅಂತ್ಯಗೊಳ್ಳುವ ದಿನಾಂಕಗಳನ್ನು ಪರಿಷ್ಕರಿಸಿದೆ. ಹಿಂದಿನ ದಿನಾಂಕಗಳು 1901ರಿಂದ 1940ರವರೆಗಿನ ಅಂಕಿಅಂಶಗಳನ್ನು ಆಧರಿಸಿದ್ದ ವು. ಆದರೆ ಕೇರಳದಲ್ಲಿ ಮಳೆಗಾಲ ಆರಂಭಗೊಳ್ಳುವ ದಿನಾಂಕ (ಜೂ.1) ಬದಲಾಗಿಲ್ಲ.

ಪರಿಷ್ಕೃತ ದಿನಾಂಕಗಳಂತೆ ವಿವಿಧ ರಾಜ್ಯಗಳಲ್ಲಿ ಎಂದಿನ ದಿನಾಂಕಗಳಿಗೆ ಹೋಲಿಸಿದರೆ ಒಂದರಿಂದ ಏಳು ದಿನಗಳ ಕಾಲ ವಿಳಂಬವಾಗಿ ಮಳೆ ಆರಂಭವಾಗಲಿದೆ.

ಆದರೆ ವಾಯುವ್ಯ ಭಾರತದ ಅಂಚಿನ ಪ್ರದೇಶಗಳಲ್ಲಿ ಎಂದಿನ ದಿನಾಂಕವಾದ ಜು.15ಕ್ಕೆ ಹೋಲಿಸಿದರೆ ಒಂದು ವಾರ ಮೊದಲೇ ಜು.8ರಂದು ಮಳೆ ಆರಂಭಗೊಳ್ಳಲಿದೆ. ದಕ್ಷಿಣ ಭಾರತದಲ್ಲಿ ಮಳೆಗಾಲ ಅಂತ್ಯಗೊಳ್ಳುವ ನೂತನ ದಿನಾಂಕವನ್ನು ಅ.15ಕ್ಕೆ ನಿಗದಿಗೊಳಿಸಲಾಗಿದೆ.

Read These Next

ಸನ್ನಿ ಅಣೆಕಟ್ಟು ನಿರ್ಮಾಣ ಗುತ್ತಿಗೆಯ ಬೆನ್ನಲ್ಲೇ; 45 ಕೋಟಿ ರೂ.ಗಳ ಚು.ಬಾಂಡ್ ಖರೀದಿಸಿದ್ದ ಬಿಜೆಪಿ ಸಂಸದನ ಕಂಪೆನಿ

ಆಂಧ್ರಪ್ರದೇಶದ ಬಿಜೆಪಿ ರಾಜ್ಯಸಭಾ ಸದಸ್ಯ ಸಿ.ಎಂ.ರಮೇಶ್ ಸ್ಥಾಪಿಸಿದ್ದ ರಿತ್ವಿಕ್ ಪ್ರೊಜೆಕ್ಟ್ ಪ್ರೈ.ಲಿ.(ಆರ್;ಪಿಪಿಎಲ್) ಹಿಮಾಚಲ ...

ಹಾಸ್ಟೆಲ್‌ಗೆ ನುಗ್ಗಿ ನಮಾಝ್ ನಿರತರ ಮೇಲೆ ಗೂಂಡಾಗಳಿಂದ ಹಲೆ; ವಿದೇಶಿ ವಿದ್ಯಾರ್ಥಿಗಳಿಗೆ ಗಾಯ

ಇಲ್ಲಿನ ಗುಜರಾತ್ ವಿಶ್ವವಿದ್ಯಾನಿಲಯದ ಹಾಸ್ಟೆಲ್‌ನಲ್ಲಿ ರಮಝಾನ್ ಪ್ರಯುಕ್ತ ರಾತ್ರಿ ಹೊತ್ತು ನಮಾಝ್ ಮಾಡುತ್ತಿದ್ದ ವಿದೇಶಿ ...

ಲೋಕಸಭಾ ಚುನಾವಣೆ ಘೋಷಣೆ; ಎಪ್ರಿಲ್ 19ರಿಂದ ಜೂನ್ 1ರವರೆಗೆ 7 ಹಂತಗಳಲ್ಲಿ ಮತದಾನ; ಜೂ.4ರಂದು ಫಲಿತಾಂಶ ಪ್ರಕಟ

ದೇಶದ ಜನತೆ ಕಾತರದಿಂದ ಕಾಯುತ್ತಿದ್ದ 18ನೇ ಲೋಕಸಭಾ ಚುನಾವಣೆಯ ವೇಳಾಪಟ್ಟಿಯನ್ನು ಭಾರತೀಯ ಚುನಾವಣಾ ಆಯೋಗ ಶನಿವಾರ ಪ್ರಕಟಿಸಿದೆ. ...