ಭಟ್ಕಳ: ದೇಶದೆಲ್ಲೆಡೆಯಲ್ಲಿ ಕೋವಿಡ್-19 ವ್ಯಾಕ್ಸಿನ್ ಹಂಚಿಕೆ ಮಾಡುವಂತೆಯೇ ಭಟ್ಕಳದಲ್ಲಿಯೂ ಕೂಡಾ ಲಸಿಕೆಯನ್ನು ನೀಡಲು ಎಲ್ಲಾ ತಯಾರಿ ಮಾಡಿಕೊಂಡಿದ್ದು ಜ.16ರ ಶನಿವಾರದಿಂದಲೇ ವ್ಯಾಕ್ಸಿನ್ ನೀಡಲು  ಆರಂಭಿಸಲಾಗುವುದು ಎಂದು ತಾಲೂಕಾ ಆರೋಗ್ಯಾಧಿಕಾರಿ ಡಾ. ಮೂರ್ತಿರಾಜ ಭಟ್ಟ ಹೇಳಿದರು. 

ಅವರು ಇಲ್ಲಿನ ತಾಲೂಕಾ ಆಸ್ಪತ್ರೆಯಲ್ಲಿ ಕೋವಿಡ್ ವ್ಯಾಕ್ಸಿನ್ ಹಂಚಿಕೆಯ ಸಂಪೂರ್ಣ ತಯಾರಿಯನ್ನು ಮಾಡಿಕೊಂಡು ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದರು. 

ಪ್ರಥಮವಾಗಿ ಶನಿವಾರದಂದು  ಈ ಮೊದಲೇ ನೋಂದಣೀಯಾಗಿರುವ 100 ಜನರಿಗೆ ವ್ಯಾಕ್ಸಿನ್ ಕೊಡುವ ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ. ಪ್ರತಿಯೋರ್ವರಿಗೂ ಎರಡು ಡೋಸ್‍ಗಳನ್ನು ನೀಡಲಾಗುವುದು ಅಲ್ಲದೇ ಆಧಾರ್ ಸಂಖ್ಯೆಗೆ ವಾಕ್ಸಿನೇಶನ್ ಆಗಿರುವ ಕುರಿತು ಲಿಂಕ್ ಮಾಡುವ ವ್ಯವಸ್ಥೆ ಕೂಡಾ ಇದೆ ಎಂದರು. ವಾಕ್ಸಿನೇಶನ್ ಮಾಡಲು ವ್ಯಕ್ತಿಯ ಹೆಸರು ಮೊದಲೇ ನೋಂದಣಿಯಾಗಿರಬೇಕು ಹಾಗೂ ಆ ಕುರಿತು ಕೂಲಂಕುಷವಾಗಿ ಪರಿಶೀಲಿಸಿದ ನಂತರವೇ ವಾಕ್ಸಿನೇಶನ್ ಮಾಡಲಾಗುವುದು ಎಂದೂ ಅವರು ಹೇಳಿದರು. 

ತಾಲೂಕಿನಲ್ಲಿ 1259 ಜನರನ್ನು ಕೋವಿಡ್ ಲಸಿಕೆಗಾಗಿ ಗುರುತಿಸಲಾಗಿದೆ. ಲಸಿಕೆ ನೀಡುವಾಗ  ಆರೋಗ್ಯ ಇಲಾಖೆಯ ಮಾರ್ಗಸೂಚಿಗಳನ್ನು ಅನುಸರಿಸಲಾಗುತ್ತದೆ. ತಾಲೂಕಿನ 13 ಕಡೆಗಳಲ್ಲಿ ಕೋವಿಡ್ ಲಸಿಕೆ ವಿತರಿಸಲು ಕ್ರಮ ಕೈಗೊಳ್ಳಲಾಗಿದೆ ಎಂದ ಅವರು ಲಸಿಕೆ ಸುರಕ್ಷಿತವಾಗಿಡಲು ಈಗಾಗಲೇ ಎಲ್ಲಾ ರೀತಿಯ ಸಿದ್ದತೆ ಕೈಗೊಳ್ಳಲಾಗಿದೆ ಎಂದರು.

ಈ ಸಂದರ್ಭದಲ್ಲಿ ಮಾತನಾಡಿದ ಸಹಾಯಕ ಆಯುಕ್ತ ಭರತ್ ಅವರು ಕೋವಿಡ್ ಲಸಿಕೆ ನೀಡುವಿಕೆಯು ಮೂರು ಹಂತದಲ್ಲಿ ನಡೆಯುತ್ತದೆ.  ಪ್ರಥಮವಾಗಿ ಆರೋಗ್ಯ ಇಲಾಖೆಯ ಸಿಬ್ಬಂದಿಗಳು ಹಾಗೂ ಅಂಗನವಾಡಿ ಕಾರ್ಯಕರ್ತೆಯರು. ಎರಡನೆಯದಾಗಿ ಫ್ರಂಟ್‍ಲೈನ್ ಕೊರೊನಾ ವಾರಿಯರ್ಸ್ ಪುರಸಭೆ ಸಿಬ್ಬಂದಿಗಳು, ಪೊಲೀಸ್ ಸಿಬ್ಬಂದಿಗಳು ಸೇರಿದಂತೆ ಅಗತ್ಯ ಸೇವೆ ನೀಡುವವರಿಗೆ ಹಾಘೂ ಮೂರನೇ ಹಂತದಲ್ಲಿ 50 ವರ್ಷಕ್ಕಿಂತ ಮೇಲ್ಪಟ್ಟವರಿಗೆ ಲಸಿಕೆ ನೀಡಲಾಗುವುದು ಎಂದರು. 

ಈ ಸಂದರ್ಭದಲ್ಲಿ ತಹಸೀಲ್ದಾರ ರವಿಚಂದ್ರ, ಆಸ್ಪತ್ರೆಯ ಆಡಳಿತ ವೈದ್ಯಾಧಿಕಾರಿ ಡಾ. ಸವಿತಾ ಕಾಮತ್ ಮುಂತಾದವರಿದ್ದರು.