ಭಟ್ಕಳ:ಗ್ರಾಮೀಣ ಭಾಗದ ಜನತೆಯೂ ಕೂಡಾ ಆರೋಗ್ಯ ಸೇವೆಯಿಂದ ವಂಚಿತರಾಗಬಾರದು ಎನ್ನುವ ಸೇವಾ ಮನೋಭಾವನೆಯಿಂದ ಮಣಿಪಾಲ ಆಸ್ಪತ್ರೆಯ ಹೃದಯರೋಗ ತಜ್ಞ ಡಾ. ಪದ್ಮನಾಭ ಕಾಮತ ಅವರು ಆರಂಭಿಸಿದ ಗ್ರಾಮೀಣ ವೈದ್ಯರಿಗೆ ಇ.ಸಿ.ಜಿ. ಯಂತ್ರ ವಿತರಣಾ ಕಾರ್ಯಕ್ರಮದೊಂದಿಗೆ ಜನೌಷಧಿ ಕೇಂದ್ರಗಳಿಗೂ ಕೂಡಾ ಇ.ಸಿ.ಜಿ. ಯಂತ್ರಗಳನ್ನು ನೀಡಲಾಯಿತು.
ಇಲ್ಲಿಯ ತನಕ 9 ಜನೌಷಧಿ ಕೇಂದ್ರಗಳಿಗೆ ಇ.ಸಿ.ಜಿ. ಯಂತ್ರಗಳನ್ನು ಪೂರೈಸಿದ್ದು 10ನೇ ಯಂತ್ರವನ್ನು ಭಟ್ಕಳದ ಜನೌಷಧಿ ಕೇಂದ್ರದಕ್ಕೆ ನೀಡಲಾಯಿತು. ಜನೌಷಧಿ ಕೇಂದ್ರದ ಜಗದೀಶ ಮೊಗೇರ ಅವರು ಯಂತ್ರವನ್ನು ಪಡೆದುಕೊಂಡು ಮಾತನಾಡಿದರು. ಇಂತಹ ಕಾರ್ಯಕ್ರಮಗಳು ನೇರವಾಗಿ ಗ್ರಾಮೀಣ ಭಾಗದ ಜನರನ್ನು ತಲುಪಲು ಅನುಕೂಲವಾಗುತ್ತದೆ. ಅನೇಕ ಗ್ರಾಮೀಣ  ಜನತೆಗೆ ಎದೆ ನೋವು ಬಂದರೆ ಎನು ಮಾಡಬೇಕು ಎನ್ನುವುದೆ ತಿಳಿಯುವುದಿಲ್ಲ, ಅಂತಹ ಸಂದರ್ಭದಲ್ಲಿ ಈ ಯಂತ್ರ ಸಹಕಾರಿಯಾಗಲಿದೆ ಅಲ್ಲದೇ ಮಣಿಪಾಲ ವೈದ್ಯರ ತಂಡದಿಂದ ಸಕಾಲದಲ್ಲಿ ಸೂಕ್ತ ಚಿಕಿತ್ಸೆಯ ಮಾರ್ಗದರ್ಶನ ದೊರೆಯುವುದು ಎಂದರು. 
ಜನೌಷಧಿ ಕೇಂದ್ರಕ್ಕೆ ಯಂತ್ರವನ್ನು ವಿತರಿಸುವ ಸಂದರ್ಭದಲ್ಲಿ ಉಪಸ್ಥಿತರಿದ್ದ ತಾಲೂಕಾ ಆಸ್ಪತ್ರೆಯ ವೈದ್ಯಾಧಿಕಾರಿ ಡಾ. ಸವಿತಾ ಕಾಮತ ಅವರು ಇ.ಸಿ.ಜಿ. ಯಂತ್ರದ ಪ್ರಾತ್ಯಕ್ಷಿತೆಯನ್ನು ವೀಕ್ಷಿಸಿದರು. 
ಬಿ.ಪಿ.ಎಲ್. ಕಂಪೆನಿಯ ಯಂತ್ರವನ್ನ ಹಲವಾರು ದಾನಿಗಳಿಂದ ಪಡೆದು ಬೇರೆ ಬೇರೆ ಕೇಂದ್ರಗಳಿಗೆ ವಿತರಿಸಲಾಗುತ್ತಿದ್ದು ಈ ಸಂದರ್ಭದಲ್ಲಿ  ಉಪಸ್ಥಿತರಿದ್ದ ಕಂಪೆನಿಯ ಪ್ರತಿನಿಧಿ ಶಿವಕುಮಾರ್ ಅವರು ಬಿ.ಪಿ.ಎಲ್. ಕಂಪೆನಿಯೂ ಕೂಡಾ ಡಾ. ಪದ್ಮನಾಭ ಕಾಮತ ಅವರೊಂದಿಗೆ ಸಹಕರಿಸಿದೆ ಎಂದರು.