ಅಸುರಕ್ಷಿತ ಮೀನುಗಾರಿಕೆ ತಡೆಗೆ ಜಿಲ್ಲಾಧಿಕಾರಿ ಪತ್ರ
ಕಾರವಾರ:ಜೀವರಕ್ಷಕ ಸಾಧನಗಳಿಲ್ಲದ ಅಸುರಕ್ಷಿತ ಮೀನುಗಾರಿಕೆಯನ್ನು ತಡೆಗಟ್ಟುವಂತೆ ಮೀನುಗಾರಿಕಾ ಉಪನಿರ್ದೇಶಕರಿಗೆ ಜಿಲ್ಲಾಧಿಕಾರಿ ಡಾ.ಹರೀಶ್‍ಕುಮಾರ್ ಪತ್ರಬರೆದು ಸೂಚಿಸಿದ್ದಾರೆ.
ಮೀನುಗಾರಿಕೆಗಾಗಿ ಬೋಟುಗಳು ಸಮುದ್ರಕ್ಕೆ ಇಳಿಯುತ್ತಿದ್ದು ಮುಂಜಾಗ್ರತಾ ಕ್ರಮವಾಗಿ ಸೂಕ್ತ ಜೀವರಕ್ಷಕ ಸಾಧನಗಳನ್ನು ಹೊಂದುವುದು ಕಡ್ಡಾಯಗೊಳಿಸಲಾಗಿದೆ. ಈ ಹಿಂದೆ ಘಟಿಸಿದ ಕೂರ್ಮಗಡ ಘಟನೆ ಮರುಕಳಿಸದಂತೆ ಎಚ್ಚರವಹಿಸುವುದು ಅಗತ್ಯವಿದ್ದು, ಅಸುರಕ್ಷಿತ ಮೀನುಗಾರಿಕೆಯನ್ನು ತಡೆಗಟ್ಟುವಂತೆ ಅವರು ಪತ್ರದಲ್ಲಿ ಸೂಚಿಸಿದ್ದಾರೆ.
ಅಧಿಕೃತ ಪರವಾನಿಗೆ ಇಲ್ಲದ ಹಾಗೂ ಜೀವರಕ್ಷಕ ಸಾಧನಗಳಿಲ್ಲದ ಬೋಟುಗಳನ್ನು ವಶಕ್ಕೆ ಪಡೆಯಲು ಈಗಾಗಲೆ ತಿಳಿಸಲಾಗಿದೆ. ಮೀನುಗಾರಿಕೆಗೆ ತೆರಳುವಾಗ ಅಧಿಕೃತ ಪರವಾನಿಗೆ ಹಾಗೂ ಜೀವರಕ್ಷಕ ಸಾಧನಗಳೊಂದಿಗೆ ತೆರಳುವಂತೆ ಸೂಚಿಸಲಾಗಿದೆ. ಆದಾಗ್ಯೂ ಅನಾಹುತಗಳು ನಡೆದ ಸಂದರ್ಭದಲ್ಲಿ ಇಲಾಖೆ ಮುಖ್ಯಸ್ಥರನ್ನೇ ನೇರ ಹೊಣೆ ಮಾಡಲಾಗುವುದು ಎಂದು ಅವರು ಪತ್ರದಲ್ಲಿ ತಿಳಿಸಿದ್ದಾರೆ.
