ಬೆಟ್ಟಿಂಗ್, ಸಾಲ ಆ್ಯಪ್ಗಳ ನಿಷೇಧಕ್ಕೆ ಕೇಂದ್ರ ನಿರ್ಧಾರ; ಚೀನಾದ ವಂಚಕ ಆ್ಯಪ್ಗಳಿಗೆ ಭಾರತದ ಪ್ರಹಾರ
ಹೊಸದಿಲ್ಲಿ: ಚೀನಾದೊಂದಿಗೆ ನಂಟು ಹೊಂದಿರುವ 138 ಬೆಟ್ಟಿಂಗ್ ಆ್ಯಪ್ಗಳು ಹಾಗೂ 94 ಸಾಲ ನೀಡುವ ಆ್ಯಪ್ಗಳನ್ನು ತುರ್ತಾಗಿ ನಿಷೇಧಿಸಲು ಕೇಂದ್ರ ಸರಕಾರ ರವಿವಾರ ನಿರ್ಧರಿಸಿದೆ. ಕೇಂದ್ರ ಗೃಹಸಚಿವಾಲಯದ ಪ್ರಸ್ತಾವದಂತೆ ಇಲೆಕ್ಟ್ರಾನಿಕ್ಸ್ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಈ ಆ್ಯಪ್ ಗಳನ್ನು ನಿಷೇಧಿಸುವ ಪ್ರಕ್ರಿಯೆಯನ್ನು ಆರಂಭಿಸಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತದ ಸಾರ್ವಭೌಮತೆ ಹಾಗೂ ಸಮಗ್ರತೆ, ಭಾರತದ ಭದ್ರತೆ, ಸಾರ್ವಜನಿಕ ಸುವ್ಯವಸ್ಥೆ ಬಗ್ಗೆ ಪೂರ್ವಾಗ್ರಹ ಹೊಂದಿದೆ ಎಂದು ಉಲ್ಲೇಖಿಸಿ ಸರಕಾರ ಈ ಹಿಂದೆ 250ಕ್ಕೂ ಅಧಿಕ ಚೀನಾ ಆ್ಯಪ್ಗಳನ್ನು ನಿಷೇಧಿಸಿತ್ತು. ಈ ಹಿಂದೆ ನಿಷೇಧಿಸಿದ ಆ್ಯಪ್ಗಳಲ್ಲಿ ಟಿಕ್ಟಾಕ್, ಕೆಂಡರ್, ಪಬ್ಜಿ ಮೊಬೈಲ್ ಶೈನ್, ಕ್ಯಾಮ್ಸ್ಯಾನರ್, ಗರೇನಾ ಫ್ರೀ ಫಯರ್ ಹಾಗೂ ಇತರ ಆ್ಯಪ್ಗಳು ಸೇರಿದ್ದವು. ವರ್ಷಗಳ ಬಳಿಕ ಸರಕಾರ ಮತ್ತಷ್ಟು ಆ್ಯಪ್ಗಳನ್ನು ನಿಷೇಧಿಸುವ ಈ ನಿರ್ಧಾರ ತೆಗೆದುಕೊಂಡಿದೆ.
ಕೇಂದ್ರ ಗೃಹ ಸಚಿವಾಲಯ ಇಲೆಕ್ಟ್ರಾನಿಕ್ಸ್ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವಾಲಯಕ್ಕೆ ಈ ವಾರ ಪ್ರಸ್ತಾವ ಸಲ್ಲಿಸಿದ ಬಳಿಕ 230 ಆ್ಯಪ್ಗಳನ್ನು ನಿಷೇಧಿಸುವ ಪ್ರಕ್ರಿಯೆಯನ್ನು ಸಚಿವಾಲಯ ಆರಂಭಿಸಿದೆ. ಈ ಆ್ಯಪ್ ಗಳು ಭಾರತದ ಸಾರ್ವಭೌಮತೆ ಹಾಗೂ ಸಮಗ್ರತೆಗೆ ಧಕ್ಕೆ ಉಂಟು ಮಾಡುವ ಅಂಶವನ್ನು ಒಳಗೊಂಡಿರುವುದರಿಂದ ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್ 69ರ ಅಡಿಯಲ್ಲಿ ಬರುತ್ತದೆ ಎಂದು ಪರಿಗಣಿಸಿದ ಬಳಿಕ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ.
ಸಂಸ್ಥೆಗಳು ಹಾಗೂ ವ್ಯಕ್ತಿಗಳು ನಿರ್ವಹಿಸುತ್ತಿರುವ ಈ ಮೊಬೈಲ್ ಆ್ಯಪ್ಗಳ ಮೂಲಕ ಸಣ್ಣ ಮೊತ್ತದ ಸಾಲ ಪಡೆದ ವ್ಯಕ್ತಿಗಳಿಂದ ಸುಲಿಗೆ ಮಾಡಲಾಗುತ್ತಿದೆ ಹಾಗೂ ಕಿರುಕುಳ ನೀಡಲಾಗುತ್ತಿದೆ ಎಂದು ಹಲವರಿಂದ ಆರೋಪಗಳು ಕೇಳಿ ಬಂದ ಹಿನ್ನೆಲೆಯಲ್ಲಿ ಈ ಕ್ರಮ ತೆಗೆದುಕೊಳ್ಳಲಾಗಿದೆ. ಈ ಆ್ಯಪ್ಗಳು ಚೀನಿಯರ ಮೆದುಳಿನ ಕೂಸು. ಭಾರತೀಯರನ್ನು ಬಳಸಿಕೊಂಡು ಅವರು ಈ ಆ್ಯಪ್ ಗಳನ್ನು ನಿರ್ವಹಿಸುತ್ತಿದ್ದಾರೆ. ಹತಾಶೆಗೆ ಒಳಗಾದ ಜನರು ಸಾಲ ತೆಗೆದುಕೊಳ್ಳುವಂತೆ ಮನವೊಲಿಸುತ್ತಾರೆ ಹಾಗೂ ಪ್ರತಿವರ್ಷ ಬಡ್ಡಿ ದರವನ್ನು ಶೇ. 3,000 ಏರಿಸುತ್ತಾರೆ ಎಂದು ಮೂಲಗಳು ತಿಳಿಸಿವೆ.
ಮುಖ್ಯವಾಗಿ ಆಂಧ್ರಪ್ರದೇಶ ಹಾಗೂ ತೆಲಂಗಾಣದಲ್ಲಿ ಇಂತಹ ಸಾಲ ಪಡೆದವರು ಹಾಗೂ ಬೆಟ್ಟಿಂಗ್ ಆ್ಯಪ್ನಲ್ಲಿ ಹಣ ಕಳೆದುಕೊಂಡವರು ಸರಣಿ ಆತ್ಮಹತ್ಯೆಗೈದ ಹಿನ್ನೆಲೆಯಲ್ಲಿ ಈ ವಿಷಯ ದೇಶದ ಗಮನ ಸೆಳೆಯಿತು. ಆನಂತರ ತೆಲಂಗಾಣ, ಒಡಿಶಾ, ಉತ್ತರಪ್ರದೇಶ ಹಾಗೂ ಸಿಬಿಐ ಈ ಆ್ಯಪ್ಗಳ ಕುರಿತು ಕ್ರಮ ತೆಗೆದುಕೊಳ್ಳುವಂತೆ ಕೇಂದ್ರ ಸರಕಾರವನ್ನು ಆಗ್ರಹಿಸಿದ್ದವು.