ಭಟ್ಕಳ: ಭಟ್ಕಳ ಪುರಸಭಾ ಕಚೇರಿಯ ಮುಂದೆ ಕನ್ನಡ, ಇಂಗ್ಲೀಷ್‍ನೊಂದಿಗೆ ಉರ್ದು ಭಾಷಾ ಬಳಕೆಗೆ ಸಂಬಂಧಿಸಿದಂತೆ ಭುಗಿಲೆದ್ದಿರುವ ವಿವಾದವನ್ನು ಜಿಲ್ಲಾಧಿಕಾರಿಗಳ ಅಂಗಳಕ್ಕೆ ಕೊಂಡೊಯ್ಯಲು ತಾಲೂಕಾಡಳಿತ ತೀರ್ಮಾನಿಸಿದ್ದು, ಜಿಲ್ಲಾಧಿಕಾರಿಗಳ ಆದೇಶದನ್ವಯ ಮುಂದಿನ ಕ್ರಮ ಜರುಗಿಸಲು ಸಿದ್ಧತೆ ನಡೆದಿದೆ.

ಸೋಮವಾರ ಉರ್ದು ಭಾಷೆ ಬಳಕೆಗೆ ಸಂಘ ಪರಿವಾರ ಸಂಘಟನೆಗಳು ಆಕ್ಷೇಪ ವ್ಯಕ್ತಪಡಿಸಿ ಪ್ರತಿಭಟನೆ ನಡೆಸಿರುವ ಹಿನ್ನೆಲೆಯಲ್ಲಿ ಭಟ್ಕಳ ಸಹಾಯಕ ಆಯುಕ್ತರು ಈ ಬಗ್ಗೆ ಪುರಸಭಾ ಮುಖ್ಯಾಧಿಕಾರಿಗಳಿಂದ ವರದಿ ಕೇಳಿದ್ದರು. ಪುರಸಭಾ ನಾಮಫಲಕ ಅಥವಾ ಸ್ಟೇನ್‍ಲೆಸ್ ಸ್ಟೀಲ್ ಅಕ್ಷರ ಅಳವಡಿಕೆ ಕಾಮಗಾರಿಗೆ ಪುರಸಭೆಯಿಂದ ಯಾವುದೇ ಆದೇಶವೂ ನೀಡಿಲ್ಲ ಎಂದು ಸ್ವತಃ ಪುರಸಭಾ ಮುಖ್ಯಾಧಿಕಾರಿ ಸುರೇಶ ಮೇಲಾಧಿಕಾರಿಗಳಿಗೆ ನೀಡಿರುವ ಲಿಖಿತ ವರದಿ ಪುರಸಭಾ ಆಡಳಿತ ಮಂಡಳಿಯನ್ನು ಕೆರಳಿಸಿತ್ತು.

ಈ ನಡುವೆ ಸದರಿ ವರದಿಯ ಆಧಾರದ ಮೇಲೆ ಮೇಲಾಧಿಕಾರಿಗಳ ಸೂಚನೆಯಂತೆ ಪುರಸಭಾ ಕಚೇರಿಯ ಮುಂದೆ ಅಳವಡಿಸಲಾದ ಕನ್ನಡ, ಇಂಗ್ಲೀಷ್, ಉರ್ದು ಮೂರೂ ಭಾಷೆಗಳ ಫಲಕವನ್ನು ತೆರವುಗೊಳಿಸಲು ಮಂಗಳವಾರ ಸಂಜೆ ಪೊಲೀಸ್ ಭದ್ರತೆಯೊಂದಿಗೆ ಪುರಸಭಾ ಮುಖ್ಯಾಧಿಕಾರಿಗಳು ಮುಂದಾಗಿರುವ ಬಗ್ಗೆ ಮಾಹಿತಿ ಪಡೆದ ಪುರಸಭಾ ವ್ಯಾಪ್ತಿಯ ನೂರಾರು ಜನರು ಪುರಸಭಾ ಕಚೇರಿಯ ಮುಂದೆ ಮತ್ತೊಮ್ಮೆ ಸೇರಲು ಆರಂಭಿಸಿದರು. ಇದರಿಂದ ಪುರಸಭಾ ಕಚೇರಿಯ ಮುಂದೆ ಉದ್ವಿಗ್ನ ವಾತಾವರಣ ನಿರ್ಮಾಣವಾಯಿತು.

ಈ ಸಂದರ್ಭದಲ್ಲಿ ಪುರಸಭಾ ಮುಖ್ಯಾಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡ ಪುರಸಭಾ ಸದಸ್ಯರು, ಮೇಲಾಧಿಕಾರಿಗಳು ಕೇಳಿರುವ ಮಾಹಿತಿಯನ್ನು ಪುರಸಭಾ ಆಡಳಿತ ಮಂಡಳಿಯ ಗಮನಕ್ಕೆ ತಾರದೇ ಹೇಗೆ ಉತ್ತರಿಸಿದ್ದೀರಿ, ಈಗ ಉಂಟಾಗಿರುವ ಪರಿಸ್ಥಿತಿಗೆ ನೀವೇ ಹೊಣೆಗಾರರು ಎಂದು ಆಕ್ರೋಶವನ್ನು ಹೊರ ಹಾಕಿದರು. ಭಟ್ಕಳ ಮಜ್ಲಿಸೇ ಇಸ್ಲಾ ವ ತಂಜೀಮ್ ಅಧ್ಯಕ್ಷ ಎಸ್.ಎಮ್.ಫರ್ವೇಜ್, ಪ್ರಧಾನ ಕಾರ್ಯದರ್ಶಿ ಅಬ್ದುರ್ರಕೀಬ್, ಇನಾಯಿತುಲ್ಲಾ ಶಾಬಂದ್ರಿ, ಇರ್ಷಾದ್ ಗವಾಯಿ, ಅಝೀಜ್ ಉರ್ರೆಹೆಮಾನ್ ಮತ್ತಿತರರು ಸ್ಥಳಕ್ಕೆ ಆಗಮಿಸಿ ಪುರಸಭಾ ಮುಖ್ಯಾಧಿಕಾರಿಗಳ ಕ್ರಮಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರು. ಕನ್ನಡ, ಇಂಗ್ಲೀಷ್, ಉರ್ದು ಫಲಕ ಅಳವಡಿಕೆಗೆ ಈಗಾಗಲೇ ಪುರಸಭೆಯ ಸಭೆಯಲ್ಲಿ ಅನುಮೋದನೆ ಪಡೆಯಲಾಗಿದೆ. ಯಾವುದೇ ಫಲಕವನ್ನು ತೆರವುಗೊಳಿಸುವುದಿದ್ದರೂ ಪುರಸಭೆಯ ಸಭೆಯಲ್ಲಿ ಚರ್ಚಿಸಲು ಅವಕಾಶ ಸಿಗಬೇಕು, ಪುರಸಭೆಯ ಆಡಳಿತ ಮಂಡಳಿಯನ್ನೇ ನಿರ್ಲಕ್ಷ್ಯಿಸಿ ಮುಖ್ಯಾಧಿಕಾರಿಗಳು ಕೆಲಸ ನಿರ್ವಹಿಸುವುದಾದರೆ ಚುನಾಯಿತ ಪ್ರತಿನಿಧಿಗಳ ಅಗತ್ಯವಾದರೂ ಏನಿದೆ ಎಂದು ಪ್ರಶ್ನಿಸಿದರು. ತಹಸೀಲ್ದಾರ ಸುಮಂತ್ ಸ್ಥಳಕ್ಕೆ ಆಗಮಿಸಿ ಪುರಸಭಾ ಸದಸ್ಯರ ಮನವೊಲಿಸಲು ಪ್ರಯತ್ನಿಸಿದರಾದರೂ ಅದಕ್ಕೆ ಸದಸ್ಯರು ಜಗ್ಗಲಿಲ್ಲ. 

ಎಸಿ ಮಮತಾದೇವಿ ಭೇಟಿ :
ಪುರಸಭಾ ಕಚೇರಿಯಲ್ಲಿ ಉದ್ವಿಗ್ನ ವಾತಾವರಣ ಮುಂದುವರೆದಿರುವಂತೆಯೇ ಸಹಾಯಕ ಆಯುಕ್ತೆ ಮಮತಾದೇವಿ ಪುರಸಭಾ ಕಚೇರಿಗೆ ಆಗಮಿಸಿ, ಪುರಸಭಾ ಅಧ್ಯಕ್ಷ ಫರ್ವೇಜ್ ಕಾಶೀಮ್‍ಜಿ ಅವರೊಂದಿಗೆ ಪ್ರತ್ಯೇಕ ಮಾತುಕತೆ ನಡೆಸಿ ತೆರವು ಕಾರ್ಯಾಚರಣೆಗೆ ಸ್ಪಂದಿಸುವಂತೆ ವಿನಂತಿಸಿಕೊಂಡರು. ನಂತರ ಸದಸ್ಯರೊಂದಿಗೆ ಚರ್ಚೆ ನಡೆಸಿದ ಅವರು, ಸರಕಾರಿ ಕಚೇರಿಯಲ್ಲಿ ನಾಮಫಲಕ ಅಳವಡಿಸುವ ಸಂದರ್ಭದಲ್ಲಿ ಪಾಲಿಸಬೇಕಾದ ನಿಯಮಗಳ ಬಗ್ಗೆ ತಿಳಿಹೇಳಲು ಪ್ರಯತ್ನಿಸಿದರು. ಆದರೆ ಇದನ್ನು ಒಪ್ಪದ ಪುರಸಭಾ ಸದಸ್ಯರು ಹಾಗೂ ತಂಜೀಮ್ ಮುಖಂಡರು, ಕನ್ನಡ, ಇಂಗ್ಲೀಷ್‍ನೊಂದಿಗೆ ಉರ್ದು ಭಾಷೆಯನ್ನು ಬಳಸುತ್ತಿರುವುದು ಹೊಸದೇನೂ ಅಲ್ಲ, ಬ್ರಿಟೀಷ್ ಕಾಲದಿಂದಲೂ ಅದು ನಡೆದುಕೊಂಡು ಬಂದಿದೆ, ಕನ್ನಡ, ಇಂಗ್ಲೀಷ್‍ನೊಂದಿಗೆ ಹೊಸ ಮೀನುಮಾರುಕಟ್ಟೆಯಲ್ಲಿ ಉರ್ದು ಬಳಸಲಾಗಿದ್ದು, ಇದನ್ನು ಸಚಿವರು, ಶಾಸಕರು ಉದ್ಘಾಟಿಸಿದ್ದಾರೆ. ಪುರಸಭಾ ಕಚೇರಿಯ ಒಳಗಿನ ಫಲಕದಲ್ಲಿಯೂ ಉರ್ದು ಬರೆಯಲಾಗಿದೆ. ಆಗ ಇಲ್ಲದ ಆಕ್ಷೇಪ, ಪ್ರತಿಭಟನೆ ಈಗ ಹುಟ್ಟಿದ್ದು ಹೇಗೆ, ನಮಗೂ ಈ ಬಗ್ಗೆ ನಿರ್ಣಯ ಕೈಗೊಳ್ಳಲು ಅವಕಾಶ ಕೊಡಿ ಎಂದು ಆಗ್ರಹಿಸಿದರು. ಇದಕ್ಕೆ ಒಪ್ಪಿಗೆ ಸೂಚಿಸಿದ ಸಹಾಯಕ ಆಯುಕ್ತೆ ಮಮತಾದೇವಿ, ಪುರಸಭೆ ಸಾಮಾನ್ಯ ಸಭೆಯನ್ನು ಕರೆದು ಈ ಬಗ್ಗೆ ನಿರ್ಣಯವನ್ನು ಅಂಗೀಕರಿಸಿ ಜಿಲ್ಲಾಧಿಕಾರಿಗಳಿಗೆ ಕಳುಹಿಸಿ, ಕಾನೂನಿನ್ವಯ ಜಿಲ್ಲಾಧಿಕಾರಿಗಳು ಕೈಗೊಳ್ಳುವ ಕ್ರಮಕ್ಕೆ ಎಲ್ಲರೂ ಬದ್ಧರಾಗಿರಬೇಕು ಎಂದು ತಿಳಿಸಿದರು. ಪುರಸಭಾ ಅಧ್ಯಕ್ಷ ಫರ್ವೇಜ್ ಕಾಶೀಮ್‍ಜಿ, ಉಪಾಧ್ಯಕ್ಷ ಕೈಸರ್ ಮೊತೇಶಮ್ ಉಪಸ್ಥಿತರಿದ್ದರು. ಡಿವಾಯ್‍ಎಸ್ಪಿ ಕೆ.ಯು.ಬೆಳ್ಳಿಯಪ್ಪ, ಸಿಪಿಐ ದಿವಾಕರ, ಎಸ್‍ಐ ಬಿ.ಸುಮಾ ಉಪಸ್ಥಿತರಿದ್ದರು.