ಭಟ್ಕಳ: ಹುಟ್ಟಿನಿಂದಲೇ ಅಂಗವಿಕಲತೆಯನ್ನು ಹೊಂದಿದ್ದ ಪುಟ್ಟ ಬಾಲಕಿ ಮೆಹರಿನ್ ಇರ್ಷಾದ್ ಅಹಮ್ಮದ್ ಹಸೀಮ್ ಪಟೇಲ್, ಈಕೆ ಈಗ 1 ವರ್ಷ 4 ತಿಂಗಳ ಬಾಲೆ. ಈಕೆಗೆ ಕಿವಿ ಕೇಳದೇ ಇರುವುದರಿಂದ ಮಾತನಾಡಲೂ ಸಾಧ್ಯವಿಲ್ಲವಾಗಿದೆ. ಈಕೆಯನ್ನು ಪರೀಕ್ಷಿಸಿದ ಬೆಂಗಳೂರಿನ ಭಗವಾನ್ ಮಹಾವೀರ ಜೈನ್ ಆಸ್ಪತ್ರೆಯ ವೈದ್ಯರು ಈಕೆಯ ಕಾಯಿಲೆಯನ್ನು ಪ್ರೊಫೌಂಡ್ ಬಿಲಾಟರಲ್ ಸೆನ್ಸಾರ್ ನ್ಯೂರಲ್ ಹಿಯರಿಂಗ್ ಲಾಸ್ ಎಂತಾ ತಿಳಿಸಿದ್ದು ಇದಕ್ಕೆ ಶಸ್ತ್ರ ಚಿಕಿತ್ಸೆಯ ಅಗತ್ಯವಿದೆ ಎಂದೂ ಹೇಳಿದ್ದಾರೆ. ಇಲ್ಲವಾದಲ್ಲಿ ಈಕೆಯು ಜೀವನ ಪರ್ಯಂತ ಅಂಗವಿಕಲೆಯಾಗಿಯೇ ಇರಬೇಕಾಗಿದ್ದು ಮಾತು ಬಾರದ ಮೂಗಿಯಾಗಿರುತ್ತಾಳೆ.  ಶಸ್ತ್ರ ಚಿಕಿತ್ಸೆಯು ಅತ್ಯಂತ ದುಬಾರಿಯಾಗಿದ್ದು 10 ಲಕ್ಷ ರೂಪಾಯಿಗಳ ವೆಚ್ಚ ಬರಬಹುದು ಎಂದು ತಿಳಿಸಿದ್ದಾರೆ. ಉಳಿದಂತೆ ಔಷಧ, ಐ.ಸಿ.ಯು., ಉಳಿದುಕೊಳ್ಳುವ ಖರ್ಚು ಎಲ್ಲ ಸೇರಿದರೆ ಇನ್ನೂ 2-3 ಲಕ್ಷ ಬೇಕಾಗಬಹುದಾಗಿದ್ದು ಅತ್ಯಂತ ಬಡವರಾದ ಇವರಿಗೆ ಅಷ್ಟೊಂದು ಹಣವನ್ನು ಹೊಂದಿಸುವು ಕಷ್ಟಕರವಾಗಿದೆ. ಶಸ್ತ್ರ ಚಿಕಿತ್ಸೆಯಿಂದ ಗುಣಪಡಿಸಬಹುದಾದ ಈ ಕಾಯಿಲೆಯಿಂದ ತಮ್ಮ ಮಗು ಪಾರಾಗಿ ಎಲ್ಲರಂತಾಗಲಿ. ಮುಂದೆ ವಿದ್ಯೆ ಕಲಿತು ತಮಗೆ ಆಸರೆಯಾಗಲಿ ಎನ್ನುವುದು ತಂದೆ-ತಾಯಿಯರ ಆಶಯವಾಗಿದ್ದರೂ ಸಹ ಹಣಕಾಸಿನ ತೊಂದರೆಯಿಂದ ತೀವ್ರ ನೊಂದು ಕೊಂಡಿದ್ದಾರೆ.  ದಾನಿಗಳು ಮಗುವಿನ ಚಿಕಿತ್ಸೆಗೆ ಧನ ಸಹಾಯ ಮಾಡಿದರೆ ಅವಳೂ ಕೂಡಾ ಎಲ್ಲರಂತೆ ಜೀವನ ಸಾಗಿಸಬಹುದು ಎನ್ನುವುದು ಅವರ ಆಶಯವಾಗಿದೆ. ತಂದೆ-ತಾಯಿಯರ ಆಶಯಕ್ಕೆ ದಾನಿಗಳು ಮುಂದಾಗಬೇಕಿದೆ.  ಅವಳ ತಾಯಿಯಾದ ನಸ್ರೀನ್ ಇರ್ಷಾದ್ ಪಟೇಲ್ ಅವರ ಹೆಸರಿನಲ್ಲಿ ಮುರ್ಡೇಶ್ವರ ಭಾರತೀಯ ಸ್ಟೇಟ್ ಬ್ಯಾಂಕ್ ನಲ್ಲಿ ಎಸ್. ಬಿ. ಖಾತೆ ಸಂಖ್ಯೆ 33933463158 ಇದ್ದು ಐ.ಎಫ್.ಸಿ.ಕೋಡ್ ಎಸ್‍ಬಿಐಎನ್0013286 ಆಗಿರುತ್ತದೆ. ಇರ್ಷಾದ್ ಅವರ ಮೊಬೈಲ್ ನಂ.7406373318 ಇದ್ದು ಅವರನ್ನು ಕೂಡಾ ಸಂಪರ್ಕಿಸಬಹುದು.