ಅಜ್ಮಾನ್: ಅಜ್ಮಾನ್ ಅಲ್ ಜುರ್ಫ್ ನಲ್ಲಿರುವ ತುಂಬೆ ಮೆಡಿಸಿಟಿಯಲ್ಲಿ ಮಂಗಳವಾರ ನಡೆದ ಗಲ್ಫ್ ಮೆಡಿಕಲ್ ಯುನಿವರ್ಸಿಟಿ (ಜಿಎಂ ಯು)ಯ 19ನೇ ಘಟಿಕೋತ್ಸವದಲ್ಲಿ ಯುಎಇಯ ಸುಪ್ರೀಂ ಕೌನ್ಸಿಲ್‌ನ ಸದಸ್ಯ ಹಾಗೂ ಅಜ್ಞಾನ್‌ನ ಆಡಳಿತಗಾರ ಶೈಖ್ ಹುಮೈದ್ ಬಿನ್ ರಶೀದ್ ಅಲ್ ನುಐಮಿ 439 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ ಮಾಡಿದರು.

ಈ ಸಂದರ್ಭ ದಲ್ಲಿ ಮಾತನಾಡಿದ ಅವರು, ಕಲಿಕೆಯನ್ನು ಮುಂದುವರಿಸಬೇಕು. ಇದು ವೃತ್ತಿ ಜೀವನದಲ್ಲಿ ಉತ್ಕೃಷ್ಟತೆಯನ್ನು ಸಾಧಿಸಲು ಇರುವ ಏಕೈಕ ದಾರಿಯಾಗಿದೆ ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.

ಜಿಎಂಯು ದಿಂದ ಪಡೆದುಕೊಂಡ ಜ್ಞಾನವನ್ನು ಉತ್ತಮ ಜಗತ್ತು ನಿರ್ಮಾಣ ಮಾಡಲು ಬಳಸು ವಂತೆ ಅವರು ಕರೆ ನೀಡಿದರು.

ಜಿಎಂಯು ಟ್ರಸ್ಟಿಗಳ ಮಂಡಳಿಯ ಅಧ್ಯಕ್ಷ, ಸ್ಥಾಪಕ ಡಾ.ತುಂಬೆ ಮೊಯ್ದಿನ್, ಸಂಸ್ಥೆಗೆ ನಿರಂತರ ಬೆಂಬಲ ನೀಡುತ್ತಿರುವ ಸರಕಾರ, ಶೈಖ್ ಹುಮೈದ್ ಬಿನ್ ರಶೀದ್ ಅಲ್ ನುಐಮಿ ಅವರಿಗೆ ಕೃತಜ್ಞತೆ ಸಲ್ಲಿಸಿದರು.

ಜಿಎಂಯು ಕುಲಾಧಿಪತಿ ಹುಸ್ಸಾಮ್ ಹಮ್ದಿ ಮಾತನಾಡಿ ನಮ್ಮ ಪದವೀಧರರನ್ನು ಅವರ ಕಠಿಣ ಪರಿಶ್ರಮ ಹಾಗೂ ದೃಢತೆಗಾಗಿ ಅಭಿನಂದಿಸಲು ಬಯಸುತ್ತೇನೆ. ಅವರ ಕುಟುಂಬಗಳಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ' ಎಂದರು.

ವೈದ್ಯಕೀಯ ಕಾಲೇಜಿನ 154, ದಂತ ಕಾಲೇಜು 68, ಫಾರ್ಮಸಿಯ 42, ಆರೋಗ್ಯ ವಿಜ್ಞಾನ ಕಾಲೇಜು 125, ನರ್ಸಿಂಗ್ ಕಾಲೇಜು 38, ಆರೋಗ್ಯ ಸೇವೆ ನಿರ್ವಹಣೆ ಹಾಗೂ ಅರ್ಥಶಾಸ್ತ್ರ ಕಾಲೇಜಿನ 12 ಪದವೀಧರರು ಸೇರಿದಂತೆ ಒಟ್ಟು 439 ವಿದ್ಯಾರ್ಥಿಗಳು ಪದವಿ ಪ್ರಮಾಣ ಪತ್ರ ಸ್ವೀಕರಿಸಿದರು.