ಮುಂಬೈ: ಮಹಾರಾಷ್ಟ್ರ, ಹರ್ಯಾಣ, ಉತ್ತರ ಪ್ರದೇಶ ಹಾಗೂ ತೆಲಂಗಾಣದಲ್ಲಿ ಶುಕ್ರವಾರ ಗಣೇಶ ವಿಗ್ರಹಗಳ ವಿಸರ್ಜನೆ ಸಂದರ್ಭದಲ್ಲಿ ಸಂಭವಿಸಿದ ದುರಂತಗಳಲ್ಲಿ ಕನಿಷ್ಠ 30 ಮಂದಿ ಮೃತಪಟ್ಟಿದ್ದಾರೆ.

ಮಹಾರಾಷ್ಟ್ರದಲ್ಲಿ ಗಣೇಶ ವಿಗ್ರಹಗಳ ವಿಸರ್ಜನೆ ವೇಳೆ ಕನಿಷ್ಠ 19 ಜನರು ಸಾವನ್ನಪ್ಪಿದ್ದಾರೆ. ಈ ಪೈಕಿ 14 ಜನರು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ.

ಜಿಲ್ಲೆಯಲ್ಲಿ ನಾಲ್ವರು, ಯಮಾಲ್, ಜಲಗಾಂವ್ ಮತ್ತು ಅಹದ್‌ ನಗರ ಜಿಲ್ಲೆಗಳಲ್ಲಿ ತಲಾ ಇಬ್ಬರು, ಪುಣೆಯ ಗ್ರಾಮೀಣ ಭಾಗ, ಧುಳೆ, ಸತಾರ ಮತ್ತು ಸೊಲ್ಲಾಪುರದಲ್ಲಿ ತಲಾ ಒಬ್ಬರು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ.

ನಾಗುರದಲ್ಲಿ ಗಣೇಶ ವಿಸರ್ಜನೆ ಸಂದರ್ಭ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ನಾಲ್ವರು ಸಾವನ್ನಪ್ಪಿದ್ದರೆ, ಶುಕ್ರವಾರ ರಾತ್ರಿ ಥಾಣೆ ನಗರದಲ್ಲಿ ಮಳೆಯ ನಡುವೆಯೇ ಗಣೇಶ ಮಂಟಪವೊಂದರ ಮೇಲೆ ಮರ ಬಿದ್ದು 55ರ ಹರೆಯದ ಮಹಿಳೆ ಮೃತಪಟ್ಟಿದ್ದಾರೆ. ಇತರ ನಾಲ್ವರು ಗಾಯಗೊಂಡಿದ್ದಾರೆ.

ರಾಜ್ಯದ ಕೆಲವು ಭಾಗಗಳಲ್ಲಿ ಗಣೇಶ ವಿಗ್ರಹಗಳ ಜಲಸ್ತಂಭನ ಸಂದರ್ಭದಲ್ಲಿ ಕೆಲವು ಕಾನೂನು ಮತ್ತು ಸುವ್ಯವಸ್ಥೆ ಸಂಬಂಧಿತ ಘಟನೆಗಳೂ ನಡೆದಿವೆ. ಅಹದ್ ನಗರ ಜಿಲ್ಲೆಯ ತೋಫಖಾನಾದಲ್ಲಿ ಮುಖ್ಯಮಂತ್ರಿ ಏಕನಾಥ್ ಶಿಂದೆ ಮತ್ತು ಮಾಜಿ ಮುಖ್ಯಮಂತ್ರಿ ಉದ್ದವ ಠಾಣೆ ಅವರ ನೇತೃತ್ವದ ಶಿವಸೇನೆ ಬಣಗಳ ಬೆಂಬಲಿಗರು ಪರಸ್ಪರ ಹೊಡೆದಾಡಿ ಕೊಂಡಿದ್ದರೆ, ಜಲಗಾಂವ್‌ನಲ್ಲಿ ಗಣೇಶ ವಿಸರ್ಜನೆ ಮೆರವಣಿಗೆ ವೇಳೆ ಜನರ ಗುಂಪೊಂದು ಮೇಯರ್ ಬಂಗಲೆಯ ಮೇಲೆ ಕಲ್ಲು ತೂರಾಟ ನಡೆಸಿದೆ. ಪುಣೆ ನಗರ, ಗ್ರಾಮೀಣ ಜಿಲ್ಲೆ ಮತ್ತು ಚಂದ್ರಾಪುರದಲ್ಲಿಯೂ ಜನರ ಗುಂಪುಗಳ ನಡುವೆ ಹೊಡೆದಾಟದ ಸಣ್ಣಪುಟ್ಟ ಘಟನೆಗಳು ವರದಿಯಾಗಿವೆ.

ಮುಂಬೈನಲ್ಲಿ ಹೆಚ್ಚಿನ ಗಣೇಶ ವಿಗ್ರಹಗಳನ್ನು ಗಿರ್ಗಾಂವ್ ಚೌಪಾಟಿಯ ಸಮುದ್ರದಲ್ಲಿ ವಿಸರ್ಜಿಸಲಾಗಿದೆ. ಶಿವಾಜಿ ಪಾರ್ಕ್, ಬಾಂದ್ರಾ, ಜುಹು ಮತ್ತು ಮಲಾಡ್ ಸೇರಿದಂತೆ ಇತರ ಹಲವಾರು ಬೀಚ್‌ಗಳಲ್ಲಿಯೂ ಗಣೇಶ ವಿಗ್ರಹಗಳನ್ನು ವಿಸರ್ಜಿಸಲಾಗಿದೆ.

ಕೋವಿಡ್ ನಿರ್ಬಂಧಗಳಿಂದಾಗಿ ಕಳೆದೆರಡು ವರ್ಷಗಳಿಂದ ಕಳೆಗುಂದಿದ್ದ ಗಣೇಶೋತ್ಸವವನ್ನು ಈ ಬಾರಿ ಭಾರೀ ಸಂಭ್ರಮದೊಂದಿಗೆ ಆಚರಿಸಲಾಗಿದೆ.

ಶನಿವಾರ ಬೆಳಗ್ಗೆವರೆಗೆ ಮುಂಬೈನಾದ್ಯಂತ 6,647 ಸಾರ್ವಜನಿಕ ಗಣೇಶ ಸೇರಿದಂತೆ 38,000ಕ್ಕೂ ಅಧಿಕ ಗಣೇಶ ವಿಗ್ರಹಗಳ ಜಲಸ್ತಂಭನ ನಡೆದಿದ್ದರೆ, ನಗರದ ಇನ್ನೂ ಹಲವು ಭಾಗಗಳಲ್ಲಿ ಗಣೇಶ ವಿಸರ್ಜನೆ ಮೆರ ವಣಿಗೆಗಳು ನಡೆಯುತ್ತಲೇ ಇದ್ದವು.ಗಣೇಶ ವಿಗ್ರಹಗಳ ಶೋಭಾಯಾತ್ರೆಗಳ ಸಂದರ್ಭ ಯಾವುದೇ ಅಹಿತಕರ ಘಟನೆಗಳು ವರದಿ ಯಾಗಿಲ್ಲ ಎಂದು ಬೃಹನ್ಮುಂಬೈ ಮಹಾ ನಗರಪಾಲಿಕೆ (ಬಿಎಂಸಿ)ಯ ಅಧಿಕಾರಿಯೋ ರ್ವರು ತಿಳಿಸಿದರು.