بنٹوال میں ایک نوجوان کو چاقو گھونپا گیا۔۔ ماحول کشیدہ۔۔حفاظتی بندوبست بڑھا دیا گیا
بنٹوال 26؍مئی (ایس او نیوز)یہاں سے قریب کلاڈکا نامی مقام پر تین نامعلوم افراد نے ایک نوجوان پرچاقو سے حملہ کردیا، جس کے بعد پولیس نے حفاظتی بندوبست سخت کردیا ہے۔
اس حملے میں زخمی ہونے والے نوجوان کا نام محمد ہاشر (۱۸سال)بتایا جاتا ہے، جسے تھمبے کے اسپتال میں داخل کیا گیا ہے۔کہتے ہیں کہ جب ہاشر، جمال اور ایک دوسرا ساتھی جمعہ کی نماز ادا کرکے واپس لوٹ رہے تھے، اس وقت کار میں آنے والے شرپسندوں نے ان پر حملہ کیا اور وہاں سے فرار ہوگئے۔ شروع میں یہ خبر آئی تھی کہ اس حملے میں دو نوجوان زخمی ہوئے ہیں، لیکن بعد میں پولیس کے اعلیٰ افسران نے تصدیق کی ہے کہ صرف ایک نوجوان ہاشر زخمی ہوا ہے۔پولیس کے مطابق حملہ آوروں کی شناخت متھن،امیت اور یتھن کی حیثیت سے کی گئی ہے۔
حملہ کے خبر عام ہوتے ہی ماحول سخت کشیدہ ہوگیااور یہاں وہاں لوگوں کا ہجوم بڑھنے لگا۔پولیس کے افسران نے فوری طور پر موقع پر پہنچتے ہوئے حالات کا جائزہ لیااوراس علاقہ میں سیکیوریٹی بڑھادی جہاں واردات پیش آئی تھی۔رپورٹ کے مطابق ڈسٹرکٹ پولیس کے علاوہ KSRPکے چار پلاٹون کو تعینات کردیا گیا ہے۔حملے سے متعلق کیس درج کرلینے کے بعد پولیس نے تحقیقات شروع کردی ہے۔