بحرین جاتے وقت گانجہ اسمگل کرنے کی کوشش۔ ملزم کو 5سال قید بامشقت اور1لاکھ روپے جرمانے کی سزا
منگلورو8؍ستمبر (ایس او نیوز) گزشتہ سال منگلورو انٹرنیشنل ایئر پورٹ سے بحرین کے لئے روانگی کے وقت تلاشی کے دوران گانجہ کے ساتھ پکڑے گئے ملزم پر جرم ثابت ہوجانے کے بعد عدالت نے اسے پانچ سال قید بامشقت اور ایک لاکھ روپے جرمانے کی سزا سنائی ہے۔
بتایا جاتا ہے کہ ملزم ابھیلاش کاسرگوڈ کا رہنے والاہے۔ 20اگست 2017کو سیکیوریٹی اور کسٹم چیکنگ کے دوران اس کے پاس کھانے پینے کی چیزوں والے ایک ایک کیلو وزنی چار پیاکٹس پائے گئے ۔ بغورمعائنہ کرنے پر اس کے اندرگانجہ چھپائے جانے کی بات سامنے آئی ۔کسٹم افسران نے ملزم کو 80ہزار روپے مالیت کے گانجہ سمیت بجپے پولیس کے حوالے کیا تھا۔ اس وقت کے پولیس انسپکٹر ٹی ڈی ناگراج نے اس معاملے کی تحقیقات کرنے کے بعد عدالت میں چارج شیٹ داخل کی تھی۔ چیف سیشن اور ڈرگس اینڈ کاسمیٹکس ایکٹ کے تحت اسپیشل کورٹ کے جج کڈلور ستیہ نارائن اچار نے کیس کی سماعت کے بعد ملزم کو قصور وار قراردیا اور مذکورہ بالا سزا سنائی۔ عدالت نے یہ حکم بھی دیا کہ جرمانہ اداکرنے میں اگر مجرم ناکام رہتا ہے تو پھر اسے مزید چھ مہینے جیل میں گزارنے ہونگے۔