30 جنوری تک گنا کسانوں کی مکمل ادائیگی کرے گی یوگی حکومت
میرٹھ ،7؍جنوری(ایس او نیوز؍آئی این ایس انڈیا)اتر پردیش کے وزیر اعلی یوگی آدتیہ ناتھ نے کہا کہ کسانوں کا ہر درد دور کیا جائے گا۔گنا کسانوں کی 30جنوری تک مکمل ادائیگی کی جائے گی۔14 دن کے اندر گنے کی ادائیگی کسانوں تک پہنچے گی۔وزیر اعلی نے کہا کہ آلو کسانوں کے مسئلہ پر حکومت فکر مند ہے۔آلو کی قیمت 487روپے قرار دیا گیا ہے۔اس میں اور اضافہ کیا جائے گا۔وزیر اعلی نے بیٹیوں کے ساتھ ہونے والے جرائم کو لے کر کہا کہ ماں بیٹی، بہن کی حفاظت حکومت کی ترجیح ہے۔وزیر اعلی یوگی ہفتہ کو میرٹھ ضلع کے محی الدین پور چینی مل کی صلاحیت میں اضافہ کئے جانے کے وقت منعقد اجتماع سے خطاب کر رہے تھے۔میرٹھ میں ہوائی اڈے بنائے جانے کے ساتھ صنعت لگانے کا اعلان کرتے ہوئے یوگی نے سماج وادی پارٹی اور بی ایس پی پر تنقید کرتے ہوئے کہا کہ گزشتہ حکومتوں میں پہلے مغربی اترپردیش میں کسانوں کو ٹیوب ویلوں کے کنکشن نہیں ملتے تھے۔بی جے پی حکومت نے کنکشن دینے شروع کر دیئے ہیں۔نوجوانوں کے لئے روزگار کے مواقع فراہم کئے جا رہے ہیں۔چھ لاکھ نوجوانوں کو تربیت دے کر بہتر بنایا گیا ہے۔ڈیڑھ لاکھ کا پلیسمینٹ ہوا ہے۔وزیر اعلی نے کہا کہ میرٹھ کے کسان اور نوجوانوں کی شناخت ہمیشہ سے ان کی محنت اور کوشش رہی ہے۔حکومت کسان اور نوجوانوں کوترقی کے راستے پر لے جانے کی کوشش کر رہی ہے۔پہلے کی حکومتوں نے کسانوں کے لیے کچھ نہیں کیا۔چینی ملوں کو برباد کر دیا۔بی جے پی حکومت نے چینی ملوں کی حالت سدھاری ہے۔وزیر اعلی نے اتر پردیش کے تمام اضلاع کو معقول بجلی دیئے جانے کا دعوی کرتے ہوئے کہا کہ بجلی کے معاملے میں کوئی تفریق نہیں کی جارہی ہے۔بجلی کی تقسیم کی نئی پالیسی نافذ کی گئی ہے۔یوگی نے کہا کہ پہلی بار وزیر اعظم نریندر مودی نے کسانوں کے مفاد کی بات کہی ہے۔کسانوں کی آمدنی کو دوگنا کرنے کی کوشش کی جارہی ہے۔پولیس میں ڈیڑھ لاکھ عہدوں پر تقرریوں کی تیاری ہے۔ 1.38 لاکھ اساتذہ کی تقرری کے ساتھ ساتھ چار لاکھ نوکری دینے کے عمل پر کام چل رہا ہے۔ روزگار کے مواقع بڑھائے جا رہے ہیں۔ریاست میں ڈھائی لاکھ کروڑ روپے کی سرمایہ کاری ہوگی، اس سے تقریبا 15 لاکھ لوگوں کو روزگار کے مواقع حاصل ہوں گے۔تمام بھرتیاں بغیر کسی امتیاز اور بدعنوانی کے کی جائیں گی۔اگر کسی بھی سطح پر تقرری میں بدعنوانی سامنے آئی تو قصورواروں کے خلاف سخت کارروائی کی جائے گی۔