بنگلورو،8؍جنوری(ایس او نیوز) کرناٹک کے وزیراعلیٰ سدارامیا اور اترپردیش میں ان کے ہم منصب یوگی آدتیہ ناتھ کے درمیان ٹوئٹر کی جنگ وائرل ہوگئی ہے۔دونوں ترقی اور انتظامیہ کے معاملے میں ایک دوسرے پر سبقت حاصل کرنے کی کوشش کررہے ہیں۔ کل یہاں بنگلورو میں بی جے پی کی ریاستی یونٹ کے زیر اہتمام منعقدہ نوا کرناٹک پریورتن یاترا ریلی میں آدتیہ ناتھ نے حصہ لیاتھا۔ سدارامیا حکومت کی دھاندلیوں کو منظر عام پر لانے بی جے پی کی جاری ریاست گیر75روزہ مہم کا پریورتن یاترا ریلی کا ایک حصہ ہے۔ سدارامیا نے اپنے ٹوئٹ میں یو پی کے وزیراعلیٰ کاخیرمقدم کرتے ہوئے کہا ہے کہ کرناٹک میں آدتیہ ناتھ کوسیکھنے کے لئے بہت کچھ ہے ۔ ان کی ریاست یو پی میں لوگ بھوک سے کس طرح ہلاک ہورہے ہیں ان کی راحت کاری کے لئے آدتیہ ناتھ کو کرناٹک سے سیکھنا چاہئے ۔ سدارامیا نے اپنے ٹوئٹرپر یوں کہا ہے ۔میں یو پی کے وزیراعلیٰ شری @myyogiadityanath کا ہماری ریاست میں خیر مقدم کرتا ہوں۔ یہاں آپ کو سیکھنے کے لئے بہت کچھ ملے گا۔ صاحب جب آپ یہاں ہیں تو اندرا کینٹین اور ایک راشن ڈپو کا ضرور معائنہ کریں ۔آپ کی ریاست میں بھوک سے مررہے لوگوں کی مدد کرنے کے لئے آپ کومدد ملے گی۔ آدتیہ ناتھ نے بھی دیانتداری سے جواب دیا ہے ۔میرا خیر مقدم کرنے کے لئے شکریہ سدارامیا جی۔ میں نے سنا ہے کہ آپ کے دور اقتدار میں کسانوں کی خودکشی کے معاملات میں اضافہ ہواہے اور یہ تعداد ظاہر کرنے والے ایماندار افسروں کاتبادلہ کردیاجاتاہے ۔