بنگلورو،6؍جنوری(ایس او  نیوز)بنگلورو شہر کے گوندراج نگر میں بی جے پی کی پریورتن ریلی کا انعقاد کیا جارہا ہے جس میں جوش وخروش پیدا کرنے کیلئے اتر پردیش کے وزیر اعلیٰ یوگی ادتیا ناتھ کو مدعو کیا گیا ہے۔ ریاست کے بی جے پی لیڈروں کو امید ہے کہ اس ریلی میں تقریباً 50,000افراد حصہ لیں گے ۔ جن کی یہ شہر میں تیسری ریلی ہوگی۔ بی جے پی کے ایم ایل سی وی سومنا نے بتایا کہ ریلی کیلئے انتظامات کئے جارہے ہیں ۔ 50,000ہزار افراد کے بیٹھنے کی سہولت کے ساتھ ساتھ240x300فیٹ کا اسٹیج بنایا گیا ہے اور وہاں کھانے پینے کاانتظام بھی ہوگا۔ سومنا کے ساتھ سابق نائب وزیر اعلیٰ آر اشوک نے اس ریلی کی تیاری کی نگرانی کی ۔ جو وجئے نگر کے بالا گنگادھر ناتھ گراؤنڈ میں منعقد ہونے والی ہے۔ اس ریلی میں یوگی شرکت کررہے ہیں ۔ ان کیلئے یہ ریاست کی دوسری مہم ہے ۔ اس سے پہلے انہوں نے 21دسمبر کو ہبلی میں ایک بڑی ریلی سے خطاب کیا تھا ۔ بی جے پی ذرائع کے مطابق شہر میں چھوٹی ریلیاں مختلف مقامات پر منعقد کی جارہی ہیں ، اس کا مقصد بنگلور انٹر نیشنل ایکزی بیشن سنٹر میں ہونے والی پریورتن یاترا کو بڑے پیمانے پر منانا ہے۔