بنگلورو،18؍اکتوبر (ایس او نیوز؍عبدالحلیم منصور) ریاستی وزیر توانائی ڈی کے شیوکمار نے چن پٹن اسمبلی حلقہ کے رکن اسمبلی سی پی یو گیشور کے کانگریس سے استعفیٰ پر تبصرہ کرتے ہوئے کہا کہ یوگیشور آنے والے اسمبلی انتخابات میں جس پارٹی سے چاہے کھڑے ہوجائیں وہ انتخابات جیتنے والے نہیں ہیں۔ چن پٹن کے ڈوڈ مالور میں پارٹی کارکنوں سے خطاب کرتے ہوئے شیوکمار نے کہاکہ یوگیشور جس پارٹی میں جانا چاہیں جائیں کانگریس کو اس کی کوئی پرواہ نہیں ہے، ساتھ ہی چن پٹن اسمبلی حلقہ میں یوگیشور کا سختی سے مقابلہ کیاجائے گا اور غالباً تکونی مقابلہ میں کانگریس سبقت حاصل کرے گی۔ اس موقع پر شیوکمار نے چن پٹن کے عوام سے مخاطب ہوکر کہا کہ ان کا کوئی بھی کام ہوتو ان کے یا ان کے بھائی کے پاس راست طور پر پہنچیں اور اپنا کام کروائیں ۔ اس دوران سی پی یوگیشور نے شیوکمار پر نکتہ چینی کرتے ہوئے کہاکہ وہ اپنے مفاد کیلئے پارٹی کا استعمال کررہے ہیں۔ وہ اپنے علاوہ وکلیگا فرقہ کے کسی اور لیڈر کو پارٹی میں سر اٹھانے کا موقع نہیں دے رہے ہیں۔ بنگلور رورل ضلع خاص طور پر چن پٹن میں ڈی کے شیوکمار نے اپنے اور اپنے بھائی کے علاوہ کسی کو سیاسی طور پر پروان چڑھنے کا موقع فراہم نہیں کیا ہے۔