لکھنؤ:29/مارچ(ایس او نیوز/آئی این ایس انڈیا) اتر پردیش کے گورنر رام نائک نے آج کہا کہ انسان کی جسمانی اور ذہنی صحت کے لئے یوگا نہایت ضروری ہے اور اسے مذہب سے نہیں جوڑا جانا چاہئے۔گورنر نے یہاں پتنجلی یوگ پیٹھ اور بھارت سوابھیمان (ٹرسٹ) اور کچھ دیگر اداروں کی طرف سے مشترکہ طور پر منعقد ہ تین روزہ پہلا ”اتر پردیش یوگا فیسٹیول“ کا افتتاح کرتے ہوئے کہا کہ وزیر اعظم نریندر مودی کی تجویز پر اقوام متحدہ نے 21 جون کو بین الاقوامی یوگا دوس قرار دیا ہے، جو ہندوستان کے لیے بڑی کامیابی ہے۔انہوں نے کہا کہ بیرون ملک میں بھی لوگوں کے تجسس کا موضوع بن چکے یوگا کا علم ہزاروں سال پہلے ماہرین نے دیا تھا۔ طبی سائنس تب آج جیسامضبوط نہیں تھا لیکن لوگ 100 سال جیتے تھے۔ یوگا دماغ اور جسم دونوں کو صحت مند رکھتا ہے۔ یوگا کو مذہب سے نہیں جوڑنا چاہئے۔گورنر نے اس موقع پر ڈاکٹر سرلے کی یوگا پر لکھی ایک کتاب کااجراء کیا۔پروگرام کی صدارت کر رہے یوگاآچاریہ بابا رام دیو نے کہا کہ یوگا سے جسمانی، روحانی، اخلاقی برائیوں اور نظریاتی تقویت ملتی ہے۔ ذہن میں طاقت پیدا ہوتی ہے اور اپنا کام اچھے طریقے سے کیا جا سکتا ہے۔رام دیو نے کہا کہ لوگ یوگا کو زندگی کا حصہ بنائیں کیونکہ یوگا جسم اور سوچ پر بھی اثر رکھتا ہے۔ اخلاقی اقدار پر عمل کرنا بھی یوگا ہے۔نائب وزیر اعلی دنیش شرما نے اس موقع پر کہا کہ ہندوستان کوعالمی رہنما بنانے میں یوگا کا اہم کردار ہو سکتا ہے۔ آج دنیا کے دوسرے ممالک میں بھی یوگا کی مقبولیت میں اضافہ ہوا ہے۔انہوں نے بابا رام دیو کے مطالبے پر یقین دہانی کرائی کہ ریاست کے سنسکرت کے اساتذہ کے مسائل اور سنسکرت بورڈ کے قیام پر غور کیا جائے گا، ساتھ ہی جسمانی تعلیم اور یوگا کی تعلیم پر بھی غور کیا جائے گا۔