بنگلورو،24فروری(ایس او نیوز) رکن پارلیمان و سابق وزیر اعلیٰ ایم ویر پا موئیلی نے کہا کہ تالابوں کے خودرو پودوں کو ہٹانے کیلئے افسروں کوہدایت دی ۔ ضلع پنچایت کانفرنس ہال میں سہ ماہی ( دشا) اجلاس میں شرکت کرتے ہوئے رکن پارلیمان نے کہا کہ جالی پودے تالابوں کے آبی سطح کو کم کررہے ہیں۔ اگرتالابوں میں تھواڑ پانی بھی جمع ہوا تو ان پودوں کی وجہ سے جانوروں کو پانی پینے سے تکلیف ہوتی ہے ۔انہوں نے کہا کہ تالابوں میں خودرو پودوں کی وجہ سے جانوروں کے حلق میں ان پودوں کے کانٹے پھنس جاتے ہیں۔ ویر پا موئیلی نے کہا کہ این ایچ ویالی اوریتناہولے اسکیم سے تالابوں کو پانی بہایا جانا ہے ۔ اس لئے تالابوں کی دیکھ بھال مناسب طریقے سے کی جانی چاہئے ۔ انہوں نے افسروں سے سوال کیا کہ دیونہلی کے وشواناتھ پورہ ہائی اسکول میں ہونے والے ایس ایس ایل سی امتحانات کا مرکز بدلنے کی کیا ضرورت تھی؟انہوں نے کہا کہ محکمہ تعلیمات عامہ کے ڈپٹی ڈائرکٹر کے دفتر کی منتقلی سے امتحانی مرکز کی تبدیلی کا کوئی تعلق ہی نہیں ہے ۔ انہوں نے بتایا کہ جس وقت وہ ریاست کے وزیراعلیٰ تھے انہوں نے گورنمنٹ ہائی اسکول اور گورنمنٹ پری یونیورسٹی کالجوں کو منظوری دی تھی ۔ انہوں نے اجلاس میں شریک ڈی ڈی پی آئی کرشنا مورتی کو حکم دیا کہ وہ وشواناتھ پورہ امتحانی مرکز کو بر قرار رکھیں۔ انہوں نے افسروں سے کہا کہ ہاؤزنگ اسکیم کے تحت کتنے خاندانوں کو رہائشی سہولت فراہم ہوئی ہے۔ اس کی ایک فہرست تیار کریں ۔ اس کیلئے کتنی ایکڑ زمین درکار ہے ۔ اس سلسلہ میں ہاؤزنگ بورڈ کے افسروں کے ساتھ تبادلہ خیال کرکے تین دن کے اندر انہیں رپورٹ پیش کریں۔ موئیلی نے کہا کہ مرکزی حکومت نے پردھان منتری سڑک اسکیم کے تحت گزشتہ ساڑھے چار برسوں کے دوران کوئی فنڈ جاری نہیں کیا ۔ اسی اسکیم کے تحت 200کروڑ روپئے مرکزی حکومت نے اپنے پاس رکھ لی ہے۔انہوں نے کہا کہ بنگلور دیہی ضلع میں عوام اور جانوروں کیلئے پینے کے پانی کی قلت بڑھتی جارہی ہے ۔ اس لئے افسروں کو چا ہئے کہ اس کیلئے ضروری اقدامات کریں ۔