دبئی ،16اگست (ایس او نیوز؍آئی این ایس انڈیا)یمنی فوج کے ایک مصدقہ ذریعے کا کہنا ہے کہ شمال مغربی حجۃ گورنری کی حیران ڈاریکٹوریٹ میں السادہ کےمقام پر حوثیوں کی گولہ باری کے نتیجے میں ایک خاندان کے تمام افراد شہید ہوگئے۔

ذرائع کا کہنا ہے کہ حجۃ گورنری میں سرکاری فوج اور اس کی حامی مزاحمتی ملیشیا کی طرف سے پیش قدمی جاری ہے۔ دوسری طرف حوثی باغی شہری آباد پر بھاری ہتھیاروں سےحملے کر رہے ہیں۔ ذرائع کا کہنا ہے کہ حجۃ گورنری میں پیش قدمی کے دوران عرب اتحادی فوج کی فضائی معاونت بھی حاصل رہی ہے۔

حالیہ چند ایام کے دوران سرکاری فوج نے حجۃ میں کئی اہم دفاعی مقامات باغیوں سے واپس لے لیے اور ایران نواز حوثیوں کو پسپائی پر مجبور کردیا ہے۔

شمال مغربی یمن کی حجۃ گورنری کے متعدد ساحلی علاقے اب سرکاری فوج کے کنٹرول میں ہیں۔

حرض اور میدی ڈاریکٹوریٹ میں حوثیوں کو بھاری جانی نقصان پہنچا ہے اور اب حیران میں شدید لڑائی جاری ہے۔ اطلاعات کے مطابق شدید لڑائی کے دوران سرکاری فوج مثلث عاھم کے مرکز سے صرف چھ کلو میٹر کی دوری پر ہے۔