کارکلا 8؍مئی (ایس او نیوز)شراب پینے کے بعد شروع ہونے والے ایک جھگڑے نے اس وقت ایک المناک رخ اختیارکرلیا جب ایک بھائی نے اپنے سگے بھائی کو ہی چھرا گھونپ کر ہلاک کرڈالا۔

موصولہ رپورٹ کے مطابق اسٹیفن (۳۳ سال) نے جھگڑے کے دوران اپنے چھوٹے بھائی آئیوان(۳۰سال) کے پیٹ میں چھرا گھونپا جس سے اس کی موت واقع ہوگئی۔ کہتے ہیں کہ شراب پینے کے بعدجھگڑنا دونوں بھائیوں کا معمول تھا۔اسٹیفن کے بارے میں بتایا جاتا ہے کہ کچھ برسوں تک اس نے خلیجی ملک میں ملازمت کی تھی، پھر وہاں سے واپس لوٹنے کے بعد گزشتہ تین سال سے پینٹر کا کام کررہا تھا۔ جبکہ آئیوان کسی مغربی ملک میں ملازمت کررہاتھا اور ابھی دو مہینے پہلے ہی واپس لوٹا تھا۔ وہ بھی یہیں پر رہتے ہوئے کسی مناسب کام کی تلاش میں تھا۔لیکن قسمت کو کچھ اور ہی منظور تھا۔اور دیکھتے ہی دیکھتے شراب نوشی کی عادت نے ایک بھائی کی جان لے لی تو دوسرے بھائی کو قاتل بنادیا۔
کارکلا پولیس نے کیس درج کرنے کے بعد اسٹیفن کو گرفتار کرلیا ہے۔