بنگلورو،22؍مئی ( ایس او نیوز؍آئی این ایس انڈیا ) کرناٹک کے وجئے پورہ ضلع کے ایک مکان میں ووٹر ویری فیبل آڈٹ ٹرائیل مشینوں کے پائے جانے کے واقعہ کے بعد سابق وزیراعلی یدی یورپا نے چیف الیکشن کمشنر کو ایک مکتوب تحریر کرتے ہوئے الزام لگایا ہے کہ حال ہی میں منعقدہ کرناٹک اسمبلی انتخابات میں بڑے پیمانہ پربے قاعدگیاں ہوئی ہیں۔ اپنے مکتوب میں انہوں نے کہا کہ انہیں اس بات کا یقین ہے کہ الیکشن کمیشن اس معاملہ کا سنجیدگی کے ساتھ نوٹس لے گا۔اس واقعہ کے سبب اسمبلی انتخابات میں بڑے پیمانہ پر دھاندلیوں کی نشاندہی ہوتی ہے۔ انہوں نے کہا کہ کرناٹک انتخابات سے پہلے بھی بی جے پی نے اسی طرح کی تشویش کا اظہار کیا تھا تاہم افسروں نے اس پر کوئی توجہ نہیں دی۔انہوں نے کہا کہ انتخابی دھاندلیوں کے بارے میں کمیشن کے علم میں بات پہلی مرتبہ نہیں لائی گئی ہے تاہم ماقبل انتخابات بھی اس طرح کی شکایت کی گئی تھی ۔