بنگلورو،17/ستمبر(ایس او نیوز) بھارتیہ جنتا پارٹی (بی جے پی) کے ریاستی صدر وسابق وزیراعلیٰ بی ایس یڈیورپا  نے واضح کیاہے کہ وہ اپنے آبائی حلقہ شیموگہ ضلع شکاری پور کی بجائے شمالی کرناٹک سے انتخابات میں حصہ لیں گے۔ ملیشورم کے پارٹی دفتر میں اخباری نمائندوں سے بات کرتے ہوئے یڈیورپا نے یہ وضاحت کی اور اعتراف کیاکہ انہوں نے شمالی کرناٹک علاقہ سے انتخابات میں حصہ لینے رضامندی ظاہر کی ہے۔ انہوں نے بتایاکہ اگر شمالی کرناٹک سے مقابلہ کیا گیا تو پارٹی کے لئے 10 تا 12؍اضلاع میں آسانی ہونے کا اندازہ لگایا گیاہے۔ اس لئے وہاں کے رہنما دباؤ ڈال رہے ہیں اور اس سلسلہ میں وہ پارٹی قائدین کے فیصلہ کا احترام کریں گے۔ مسٹر یڈیورپا نے بتایاکہ وزیراعظم نریندرمودی کے جنم دن کے موقع پر آج ملک بھرمیں ’’سیوادیوس‘‘ منایا جارہاہے۔ اس لئے ریاست بھرمیں بھی صفائی کرنے کے علاوہ دیگر کئی پروگرامس کا بھی انعقاد کیا گیا۔ انہوں نے بتایاکہ شیشادری روڈ پر واقع گاندھی مجسمہ کی صفائی کرنے کا اہتمام کیا گیا تھا۔ لیکن وہاں کانگریس اسٹوڈنٹس ونگ کی جانب سے احتجاجی دھرنا دیئے جانے کی وجہ سے صفائی کا پروگرام منسوخ کردیاگیا۔ اس کے علاوہ تمام پروگرامس حسب اعلان کئے گئے ہیں۔ اس موقع پر ایڈی یورپا نے شہر میں بارش کی وجہ سے جن علاقوں میں نقصانات ہوئے ہیں وہاں کے مکینوں میں ہرایک خاندان کے لئے 10؍کلوچاول کے بیگس تقسیم کئے۔ اس موقع پر پارٹی کے دیگر لیڈر موجود تھے۔