بنگلورو،6؍اکتوبر(ایس او نیوز؍عبدالحلیم منصور) سابق وزیر اعلیٰ اور ریاستی بی جے پی صدر بی ایس یڈیورپا نے شمالی کرناٹک کے کسی اسمبلی حلقہ سے انتخاب لڑنے کے اعلان سے انحراف کرتے ہوئے اعلان کیا ہے کہ وہ اپنے شکاری پور اسمبلی حلقہ سے ہی چناؤ میں حصہ لیں گے۔ ریاست کے طاقتور لنگایت طبقے کی طرف سے علیحدہ مذہب کا درجہ دینے کی مانگ کو دیکھتے ہوئے شمالی کرناٹک میں بی جے پی کے حق میں لنگایتوں کی گھٹتی ہوئی حمایت کے سبب یہاں اس خوف سے کہ یڈیورپا کو منہ کی کھانی نہ پڑے ، انہوں نے طے کیا ہے کہ وہ اپنے ہی حلقہ سے چناؤ میں حصہ لیں گے۔ آج یڈیورپا نے بتایاکہ مختلف پارٹی لیڈروں نے ان سے یہ کہا ضرور تھاکہ شمالی کرناٹک کے بادامی حلقہ سے چناؤ لڑیں، لیکن انہوں نے طے کیا ہے کہ شکاری پور حلقہ سے ہی چناؤ لڑیں گے۔ بعض وزراء اور اراکین اسمبلی کے ٹھکانوں پر انکم ٹیکس کے چھاپوں کے جواب میں اے سی بی کے چھاپوں پر ردعمل ظاہر کرتے ہوئے یڈیورپا نے کہاکہ وزیر اعلیٰ سدرامیا ان چھاپوں کے ذریعہ انتقام لینا چاہتے ہیں یہ ان کے احمق ہونے کا ثبوت ہے۔ انکم ٹیکس افسران کے ٹھکانوں پر اے سی بی کے چھاپوں پر تبصرہ کرتے ہوئے انہوں نے کہاکہ مرکزی حکومت کے کسی بھی افسر پر چھاپے مارنے کا ریاستی حکومت کو کوئی اختیار نہیں ہے۔ یڈیورپانے کہا کہ آنے والے دنوں میں انکم ٹیکس کے افسران ریاست کے اور بھی وزراء کے ٹھکانوں پر چھاپے مارنے والے ہیں۔