بنگلورو،23؍ اگست(ایس او نیوز)سابق وزیراعلیٰ اور ریاستی بی جے پی صدر بی ایس یڈیورپا کو آج اس وقت راحت ملی جب شیورام کارنت لے آؤٹ کی اراضی ڈی نوٹی فائی کرانے کے معاملے میں کل ہی حاضر ہونے کا نوٹس جاری کرنے والی انسداد کرپشن بیورو نے ہائی کورٹ میں اس معاملے کی سماعت کو دیکھتے ہوئے حاضری کا نوٹس واپس لے لیا اور اس معاملے کی سماعت کیلئے 28 اگست کی تاریخ طے کی۔ اس سلسلے میں انسداد کرپشن بیورو نے ہائی کورٹ کے اگلے حکم تک کا انتظار کرنے کا فیصلہ کیا ہے۔ ڈی نوٹی فکیشن کے سلسلے میں اے سی بی کی طرف سے ان کے خلاف جو کارروائی شروع کی گئی ہے اسے رد کرنے کی گذارش کے ساتھ یڈیورپا ہائی کورٹ سے رجوع ہوئے ہیں، جس کے سبب اے سی بی نے معاملے کو عدالت میں نمٹائے جانے تک یڈیورپا کو طلب نہ کرنے کا فیصلہ کیا ہے۔ عدالت نے بھی اس معاملے کی سماعت 28اگست کو مقرر کی ہے۔ جس کے بعد اے سی بی کی طرف سے اگلی کارروائی کی جائے گی ۔ساتھ ہی آج اے سی بی نے یڈیورپا کو جاری کئے گئے سمن واپس لینے اور عدالت میں اس ضمن میں فیصلے تک یڈیورپا کو گرفتار نہ کرنے کی یقین دہانی بھی کرائی۔ آج اس معاملے کی سماعت کے دوران یڈیورپا کی طرف سے معروف وکیل سی وی ناگیش نے عدالت کو بتایا کہ ایک ہی شکایت پر دو ایف آئی آر درج کرنے کی قانون میں گنجائش نہیں ہے۔ اے سی بی نے اس معاملے میں 16اور17اگست کو دو الگ الگ ایف آئی آر درج کئے ہیں ان دونوں کو رد کردیا جائے۔ اس سے پہلے چونکہ یہ معاملہ سپریم کورٹ میں زیر سماعت ہے اسی لئے اس پر دوبارہ ایف آئی آر درج نہ کرنے کی واضح ہدایت دی ہے، لیکن اے سی بی نے معاملے کی جانچ کے بغیر ایف آئی آر درج کیا ہے جو کہ سپریم کورٹ کی حکم عدولی ہے۔ سپریم کورٹ کی ہدایت کے مطابق اے سی بی کو اس معاملے کی جانچ دو ماہ میں مکمل کرنی چاہئے تھی، لیکن دو ماہ کا عرصہ گزر جانے کے بعد بھی اے سی بی خاموش رہی اور اب اگست میں ایف آئی آر درج کیاگیا ہے جو سیاسی انتقام کا نتیجہ ظاہر ہوتاہے، اسی لئے عدالت اس ایف آئی آر کو مسترد کردے۔ مسٹر ناگیش نے عدالت کو بتایا کہ شیورام کارنت لے آؤٹ کی زمین ڈی نوٹی فائی کرنے کا معاملہ ابھی ابتدائی مرحلے میں ہے اس سلسلے میں قطعی نوٹی فکیشن بھی جاری نہیں ہوا ہے، اسی لئے یڈیورپا کے خلاف مقدمہ ہی نہیں بنتا۔ مسٹر ناگیش نے اس سلسلے میں ڈی نوٹی فکیشن کے کیس میں ریاستی ہائی کورٹ کے پچھلے فیصلوں کے متعلق بھی جج اروند کمار کو آگاہ کرایا۔ ناگیش کے دلائل کوسننے کے بعد جسٹس اروند کمار نے اے سی بی کے وکیلوں کو ہدایت دی کہ پیر کے روز وہ اپنی طرف سے دلائل پیش کریں۔