بنگلورو،3؍ستمبر(ایس او نیوز) ریاستی حکومت کی جانب سے اعلان کردہ کسانوں کے قرضہ معافی اسکیم میں کوئی وضاحت نہیں ہے ، اب تک سرکاری حکمنامہ منظر عام پر نہیں آیا۔ اس طرح غیر واضح مبہم اقدام سے کسانوں کی الجھن سلجھ نہیں پائے گی۔یہ باتیں سابق ریاستی وزیراعلیٰ بی ایس ایڈی یورپا نے باگل کوٹ کے مدھو ل میں اخباری نمائندوں سے بات چیت کرتے ہوئے کہیں۔

انہوں نے تنقید کرتے ہوئے کہا کہ حکومت کے سو دن مکمل ہونے کے باوجود انتظامیہ میں پیش رفت دکھائی نہیں دے رہی ہے ۔ حکومت نے اب تک صرف افسروں کا تبادلہ کرنے کا کام کیا ہے ۔تبادلہ کارروائی کو ہی دھندہ بنا لیا گیا ہے ۔ انہوں نے کہاکہ سدارامیا پھر ایک مرتبہ وزیراعلیٰ بننے کا خواب دن میں دیکھنے لگے ہیں، سدارامیا کی یہ خواہش پوری نہیں ہونے والی نہیں ہے ۔ اگر وہ لوک سبھا انتخاب میں مقابلہ بھی کریں تو ریاستی سیاست میں کوئی تبدیلی آنے والی نہیں ہے ، کانگریس اور جے ڈی ایس کے اراکین اسمبلی خود اس قسم کی باتیں کررہے ہیں۔ وزیراعلیٰ کمار سوامی بھی کہنے لگے ہیں کہ جب تک اقتدار پر ہوں اچھے کام کروں گا۔ اقتدار سے چمٹے رہنے کے لئے کوئی کسر نہیں کروں گا ۔ ان تمام باتوں سے واضح ہوتا ہے کہ ریاستی حکومت زیادہ دن چلنے والی نہیں ہے۔