بنگلور:17/جنوری(ایس او نیوز) سنگولی راینا برگیڈ کی تشکیل کے سبب ریاستی بی جے پی صدر یڈیورپا اور کونسل کے اپوزیشن لیڈر ایشورپا کے درمیان اختلافات دن بدن شدت اختیار کرتے ہی جارہے ہیں۔ بنگلور میں جہاں یہ دو لیڈر آپس میں نبرد آزما ہیں تو دوسری طرف شیموگہ میں آج ان دونوں کے حامیوں میں زبردست مارپیٹ کی نوبت آگئی۔ شیموگہ ضلع بی جے پی دفتر میں ضلع بی جے پی صدر ردرے گوڈا کی موجودگی میں ہی دونوں گروپوں کے درمیان چھڑی لفظی جھڑپ نے دیکھتے ہی دیکھتے ہاتھا پائی کی شکل اختیار کرلی۔ بتایاجاتاہے کہ کل ایک اخباری کانفرنس کے دوران یڈیورپا گروپ کے ایک لیڈر نے الزام لگایاتھاکہ ایشورپا گروپ کے لوگ غنڈہ گردی پر اتر آئے ہیں۔ اس پر ایشورپا کے حامیوں نے آج سخت اعتراض کیا۔ کل اخباری کانفرنس میں مقامی لیڈر نے مطالبہ کیاتھاکہ ایشورپا کے حامیوں کو فوراً پارٹی سے نکالاجائے۔آج ایشورپا کے حامیوں نے مطالبہ کیا کہ یڈیورپا کے حامی پرشوتم کو پارٹی سے نکال دیا جائے۔اسی بات کو لے کر دو گروپوں میں لفظی جھڑپ شروع ہوئی اور بعد از اں ہاتھا پائی کی نوت آگئی۔ اس دوران شیموگہ ضلع کے سینئر بی جے پی لیڈر اور سابق رکن اسمبلی آئینور منجوناتھ نے کے ایس ایشورپا پر رکیک حملہ کرتے ہوئے کہاکہ جنتادل (ایس) سے ملی بھگت کے نتیجہ میں ایشورپا نے سنگولی راینا برگیڈ کا قیام کیا ہے۔ان کا مقصد صرف یہی ہے کہ یڈیورپا کو وزیر اعلیٰ بننے سے روکا جائے۔ منجوناتھ نے کہا کہ ایشورپا مفاد پر ستی کی سیاست پر اتر آئے ہیں۔ جنتادل (ایس) سے خفیہ سودے بازی کا الزام لگاتے ہوئے انہوں نے کہاکہ ریاستی بی جے پی کو اقتدار سے دور رکھنے کی سازش میں ایشورپا اہم آلہئ کار بن گئے ہیں۔