بنگلورو،8؍ جولائی (ایس او  نیوز) کرناٹک کے دو وزراء اعلیٰ کی حلف برداری کیلئے 59 لاکھ روپئے خرچ ہوئے ہیں ۔ حال ہی میں منعقدہ کرناٹک اسمبلی انتخابات میں زیادہ سیٹیں حاصل کرنے والی بی جے پی نے اسمبلی میں اکثریت ثابت کرنے کی یقین دہانی کراتے ہوئے بی ایس ایڈیورپا کو وزیر اعلیٰ بنایا گیا۔راج بھون میں بی ایس ایڈی یورپاکی حلف برداری ہوئی ۔ اکثریت ثابت نہ ہونے پرایڈی یورپا نے وزیر اعلیٰ کے عہدہ سے استعفیٰ دے دیا اور کرناٹک میں کانگریس ۔ جے ڈی ایس کی قیادت میں مخلوط حکومت بنی ۔ اس کے بعد ودھان سودھا کے احاطے میں ایچ ڈی کمار سوامی نے وزیر اعلیٰ کی حیثیت سے حلف لیا ۔ صرف 6 دنوں میں شہر میں دو حلف برداری کی تقاریب منعقد ہوئی ۔

آرٹی ای کارکن ٹی نرسمہا مورتی کے مطابق 17مئی کو بی ایس ایڈی یورپا نے راج بھون میں جو حلف لیا اس کے لئے 16لاکھ 14ہزار 750 روپئے خرچ ہوئے جبکہ 23 مئی کو منعقدہ وزیر اعلیٰ ایچ ڈی کمار سوامی اور نائب وزیر اعلیٰ جی پرمیشور کی حلف برداری تقریب کے موقع پر 42 لاکھ 89 ہزار 940 روپئے خرچ ہوئے ہیں ۔ ٹی نرسمہامورتی کے مطابق بی ایس ایڈی یورپا کی چند منٹ کی حلف برداری کیلئے جو ڈیکوریشن کیا گیا تھا اس کیلئے 21,750 روپئے خرچ ہوئے جبکہ 15.93 لاکھ روپئے صرف اسنیکس کے لئے خرچ ہوئے ہیں ۔

واضح رہے کہ بی ایس ایڈی یورپا نے حلف برداری کی تقریب سادہ طریقہ سے منائی تھی جبکہ ایچ ڈی کمار سوامی کی تقریب میں اے آئی سی سی لیڈرس راہول گاندھی اور سونیا گاندھی کے علاوہ این سی پی کے صدر شردپوار ، 5 مختلف ریاستوں کے وزراء اعلیٰ اور کئی اپوزیشن پارٹی کے لیڈروں نے شرکت کی تھی ۔