بنگلورو،20؍فروری(ایس او نیوز) سینئر کانگریس لیڈر اور سابق وزیرایچ وشواناتھ نے کہا کہ ریاستی حکومت نے عوام کی فلاح کیلئے رائج یشسوینی اسکیم کو ختم کرکے اسے واجپائی آروگیہ اسکیم میں ضم کرنے کی کوشش کی ہے۔آج میسور میں اخباری نمائندوں سے بات چیت کرتے ہوئے بتایاکہ یشسوینی اسکیم ریاست کیلئے طرۂ امتیاز کی حامل ہے۔اس اسکیم کو ختم کرنے کی کوشش نہیں ہونی چاہئے۔ انہوں نے کہاکہ یشسوینی طرز کی اسکیم ملک کی کسی بھی ریاست میں نہیں ہے۔ اگر اس اسکیم کو واجپائی آروگیہ یوجنا میں ضم کیاگیا تو اس سے کسی کوفائدہ نہیں ہوگا۔ انہوں نے بتایاکہ آر ایس ایس کی ذہنیت کے حامل کچھ آئی اے ایس افسران یشسوینی اسکیم کو ختم کرکے اسے واجپائی آروگیہ یوجنا میں ضم کرنا چاہتے ہیں۔وزیر صحت رمیش کمار کو ان افسران کا مشورہ خاطر میں نہیں لانا چاہئے۔ انہوں نے کہاکہ اب تک یشسوینی اسکیم کیلئے فنڈز کی فراہمی میں بھی کوئی رکاوٹ نہیں آئی ہے، پتہ نہیں ریاستی حکومت افسران کی باتوں میں آکر کیوں اس اسکیم کو ختم کرنے پر تلی ہوئی ہے۔ انہوں نے کہاکہ حکومت نے اگر افسران کی باتوں میں آکر یشسوینی اسکیم کو ختم کیا تو یہ ایک فلاحی اسکیم کا قتل کرنے کے مترادف ہوگا۔عوام کیلئے انتہائی مفید ثابت ہونے والی اسکیم کو غیر ضروری طور پر تاراج کیا جارہا ہے۔ انہوں نے کہا کہ مرکزی حکومت پہلے ہی واجپائی آروگیہ شری اسکیم چلانے میں پوری طرح ناکام ہوگئی ہے۔ یشسوینی جیسی کامیاب اسکیم اگر اس ناکام اسکیم میں ضم کی گئی تو یہ اسکیم بھی بے مقصد ہوکر رہ جائے گی۔ انہوں نے کہاکہ اس سلسلے میں جلد ہی وہ وزیر اعلیٰ سدرامیا اور وزیر صحت رمیش کمار کو ایک مکتوب روانہ کریں گے۔