انکولہ :09/ستمبر (ایس اؤنیوز) تعلقہ کے سرحدی علاقوں کے ڈونگری گرام پنچایت حدود کے ملگام، ساتن بائیل، ہلولی ، بدرلی میں جمعرات کو ہوئی تیز اور موسلادھار بارش کے ساتھ ساتھ طوفانی ہواؤں کے نتیجے میں 5جانور ہلاک ہوگئے جبکہ کئی گھروں، کھیتوں اور باغات کو بھی نقصان پہنچنے کی اطلاعات موصول ہوئی ہیں ۔
انکولہ تعلقہ کے ڈونگری گرام پنچایت کے ہلولی ،ملگام ، ساتن بائیل وغیرہ دیہات میں بارش کی وجہ سے عام زندگی مفلوج ہوکر رہ گئی ۔ رام سدی شخص کے ملکیت والے گھر پر درخت گرنے سے پوراگھر منہدم ہوگیا۔ اسی طرح سویتا سبرائے سدی کے گھر کو بھی نقصان پہنچا ہے تو 5جانور ہلاک ہوئے ہیں۔ ایک گائے زخمی ہوئی ہے 2جانور لاپتہ ہوئے ہیں۔ علاقے میں کئی گھروں کو نقصان پہنچا ہے۔ ہلولی سے ڈونگری جانے والی سڑک پر سیکڑوں درخت گرنے کی وجہ سے نقل وحمل میں کافی دقت پیش آرہی ہے۔ ڈونگری گرام پنچایت صدر گوپنا وئیدیا ، پی ڈی اؤ گریش نایک، محکمہ تحصیل ، باغبانی کے افسران عوامی نمائندوں کے ساتھ جائے وقوع کا دورہ کرتے ہوئے معائنہ کیا ہے۔