بھٹکل میں ’عالمی یوم معذورین ‘کے موقع پر محکمہ تعلیم کی جانب سے خصوصی پروگرام کا انعقاد
بھٹکل4؍دسمبر (ایس او نیوز) بھٹکل بلاک ایجوکیشن آفیسر کے دفتر اور بلاک ریسورس سنٹر کے اشتراک سے3دسمبر کو’عالمی یوم معذورین ‘کے موقع پرمعذور طالب علموں کے لئے خصوصی پروگرام منعقد کیاگیا۔ جس میں خطاب کرتے ہوئے بھٹکل کے بلاک ایجوکیشن آفسر مسٹر ایم آر مونجی نے کہا کہ معذور بچوں کے ساتھ خصوصی توجہ والا برتاؤ اپنا نا چاہیے اور ان کے اندر موجود دیگر صلاحیتو ں کو اجاگر کرنے اور ان کی سراہنا کرنے کی کوشش کرنا چاہیے۔ معذور بچوں کے ساتھ بھی بڑی شفقت اور محبت سے پیش آنے اور ان کے ساتھ عام بچوں کی طرح برتاؤ کرنے والے ہی حقیقی والدین ہوتے ہیں۔
بلاک ریسورس افیسریلّمّا نے پروگرام کی صدارت کی۔انہوں نے اپنے خطاب میں معذوربچوں کے لئے سرکار سے ملنے والی مختلف سہولتوں اور اسکیموں کے بارے میں تفصیلی معلومات پیش کیں۔اور کہا کہ معذور بچوں کے اندر موجود خصوصی صلاحیتوں کو اجاگر کرنے کاکام اساتذہ اور والدین کو کرنا چاہیے۔ ان بچوں میں جوش اورولولہ بھرنے کا کام ہرایک کو کرناچاہیے۔
اس موقع پر بھٹکل ٹی ایم سی کے رکن کرشنا نائک، بھٹکل تعلقہ پرائمری ٹیچرس ایسوسی ایشن کے صدر شنکر نائک وغیرہ نے بھی خطاب کرتے ہوئے معذور بچوں کی پرورش اور ان کی صحیح تربیت کیے جانے کی اہمیت جتائی۔
ہرلی سال اسکول کے معذور طلبہ نوین اور نمرتا کی پرارتھنا سے پروگرام کا آغاز ہوا۔بلاک ریسورس پرسن سنتوش شریشٹی نے استقبال کیا۔سی آر پی راگھویندرا اڈیگا نے شکریہ اداکیا۔بی آر پی آنند نائک نے نظامت کی۔ اس موقع پر محکمہ تعلیمات کے مختلف شعبہ جات کے تمام ذمہ داران موجود تھے۔ پروگرام کے بعد بچوں او ران کے والدین کی خاطر تواضع کی گئی۔
اس خصوصی پروگرام میں معذور بچوں کے لئے کھیل کودکے مقابلے، میوزیکل چیر،کلچرل مقابلے،ڈرائنگ، بھکتی گیت وغیرہ کے مقابلے بھی رکھے گئے تھے۔بچوں کے والدین کے درمیان میوزیکل چیراور فلمی گانوں کے مقابلے ہوئے۔ان مقابلوں کے بعد والدین اور بچوں کے لئے کھانے پینے کا انتظام کیا گیا۔ پھر مقابلے جیتنے والوں کو انعامات اور سرٹفکیٹس سے نوازا گیا۔مقابلے کے تمام شرکاء کو سرٹفکیٹس دئے گئے۔اس خصوصی پروگرام میں جملہ 126افراد نے حصہ لیا۔