ہم نہ بھولیں گے اور نہ ہی معاف کریں گے ، حملے کا بدلہ لے کر رہیں گے: پلوامہ حملے پر سی آر پی ایف کا سخت تبصرہ
نئی دہلی،15 ؍فروری (ایس او نیوز؍آئی این ایس انڈیا) جموں وکشمیر کے پلوامہ میں دہشت گردوں نے بزدلانہ جو حملہ کیا ہے، اس پر مرکزی ریزرو پولیس فورس یعنی سی آر پی ایف کی جانب سے سخت رد عمل آیا ہے۔
پلوامہ دہشت گردانہ حملے میں اپنے ساتھیوں کو کھونے والے سی آر پی ایف نے واضح طورپرکہہ دیا ہے کہ وہ اس حملے کو نہ بھولیں گے اور نہ ہی معاف کریں گے۔
سی آر پی ایف نے دہشت گردوں کو سخت لہجے میں کہا ہے کہ وہ اس گھناؤنے حملے کا بدلہ ضرور لیں گے۔ دراصل جمعرات کو پلوامہ میں سی آر پی ایف کے قافلے پر حملے کی وجہ 41 جوان شہید ہو گئے تھے۔اس کے بعد پورے ملک میں ناراضگی کا ماحول ہے۔
سی آر پی ایف نے ایک ٹویٹ کرکے کہا کہ ہم نہ بھولیں گے اور نہ ہی معاف کریں گے۔ ہم پلوامہ دہشت گردانہ حملے میں شہید جوانوں کوسلام کرتے ہیں اور اپنے شہید بھائیوں کے خاندان والوں کے ساتھ کھڑے ہیں۔اس گھناؤنے حملے کا بدلہ لیا جائے گا۔ اس ٹویٹ کے ساتھ سی آر پی ایف نے ایک تصویر بھی شیئر کی ہے جس کے ذریعے اس نے اپنے شہید جوانوں کو خراج عقیدت پیش کیا ہے۔
دراصل جمعرات کو سی آر پی ایف کا قافلہ جموں سے سرینگر جا رہا تھا۔اس قافلے میں تقریبا 70 گاڑیاں تھیں اور 2500 جوان شامل تھے۔اسی دوران سامنے سے دھماکہ خیز مواد سے لدی ایک ایس یو وی کار آئی اور اس نے سی آر پی ایف کی بس میں ٹکر مار دی۔دہشت گرد نے جس گاڑی سے ٹکر ماری تھی، اس میں تقریباً350 کلو دھماکہ خیز مواد تھے۔اس کی وجہ سے دھماکہ اتنا خطرناک ہوا کہ اس میں 41 جوان شہید ہو گئے۔اس واقعہ پر وزیر اعظم مودی نے براہ راست طور پر کہا ہے کہ دہشت گرد بہت بڑی غلطی کر چکے ہیں اور اب انہیں اس کا انجام بھی بھوگتنا ہوگا۔
وزیر داخلہ سنگھ جموں کشمیر کے گورنر ستیہ پال ملک، داخلہ سکریٹری راجیو گوبا، سی آر پی ایف کے ڈائریکٹر جنرل آر آر بھٹناگر، جموں کشمیر کے ڈی جی پی دلباغ سنگھ اور دیگر لوگوں نے شہید جوانوں کو چادر عقیدت پیش کی۔ سنگھ نے کہاکہ قوم ہمارے بہادر سی آر پی ایف جوانوں کی قربانی کو نہیں بھولے گی۔ میں نے پلوامہ کے شہیدوں کو اپنی آخری خراج تحسین پیش کی ہے۔ قربانی ضائع نہیں ہوگی۔
