کنداپور21؍اپریل (ایس او نیوز) یہاں سے قریب آنے گُڈّے میں واقع ونائیکا ٹیمپل میں پوجا کے لئے آئی ہوئی ایک خاتون کی بیگ سے نامعلوم خواتین کی ٹولی نے سونے کے زیورات اڑا لئے اور پوری ٹولی اطمینا ن کے ساتھ کار میں بیٹھ کر فرارہوگئی۔
بتایا گیا ہے کہ بنگلورو کی جیوتی نامی ایک خاتون کولّور میں اپنے رشتے دارکے یہاں شادی میں شرکت کے لئے آئی ہوئی تھی۔جب وہ آنے گڈے کے ونائیکا مندر پہنچی اورپوجا کے بعد آرتی لے رہی تھی،کہ اس دوران چار اجنبی خواتین پر مشتمل ایک ٹولی اس کی بیگ کا زِپ کھولتے ہوئے اس میں موجود ۲ سونے کی چین، ایک نیکلیس اور ایک سونے کی چوڑی پر ہاتھ صاف کرنے کے بعد کار میں بیٹھ کر فرار ہونے میں کامیاب ہوگئی۔
جیوتی کی شکایت درج کرنے کے بعد پولیس نے مندر کے سی سی کیمرے کا فوٹیج چھان مارا تو جس کار میں لٹیری خواتین فرار ہوئی تھیں، اس کا رجسٹریشن نمبر کا پتہ چل گیا۔اس ثبوت کو بنیاد بنا کر پولیس نے اپنی تحقیقات تیز کردی ہے۔