کمٹہ میں بس کی بائک سے ٹکر؛ خاتون کی موقع پر موت، شوہر زخمی
کمٹہ 7/ستمبر (ایس او نیوز) تعلقہ کے باڈ نامی مقام پر بس نے ایک بائک کو ٹکر ماردی،اور ٹکر لگتے ہی بائک کی پچھلی سیٹ پر سوار خاتون نیچے گر کربس کے پہیہ کی زد میں آنے سے اُس کی موقع پر ہی موت واقع ہوگئی۔ حادثہ آج جمعہ صبح قریب 8:30 بجے پیش آیا۔
مرنے والی خاتون کی شناخت مریم بی شیخ (50) کی حیثیت سے کی گئی ہے۔ حادثے میں اس کے شوہر کو بھی چوٹ لگی ہے جس کی شناخت مغل احمد (53) کی حیثیت سے کی گئی ہے۔یہ لوگ کمٹہ کے بِرکوڈی کے رہنے والے تھے۔
ذرائع کے مطابق یہ دونوں بائک پر سوار مچھلیاں خریدنے کے لئے سڑک کے کنارے رُکے ہوئے تھے کہ اچانک مخالف سمت سے آنے والی بس ان کی بائک کو چھوگئی، بس کو چھوتے ہی بائک گرگئی اور خاتون بس کے پہیے کے نیچے گرپڑی اور پل بھر میں پہیہ اُس کے اوپر سے گذرنے کی وجہ سے اُس نے وہیں دم توڑ دیا۔ ٹکر لگنے سے مغل احمد بھی نیچے گرپڑا، اس کے پائوں کو چوٹ لگی ہے۔
بتایا گیا ہے کہ سرکاری بس، کمٹہ بس اسٹائنڈ سے اگناشنی قصبہ جارہی تھی کہ اندرونی راستہ پر باڈ نامی مقام پر یہ حادثہ پیش آیا۔عوام نے بس ڈرائیور پر لاپرواہی سے ڈرائیونگ کرنے کا الزام عائد کرتے ہوئے بتایا ہے کہ ڈرائیور کی لاپرواہی سے ایک خاتون کی جان چلی گئی ہے۔
مہلوک خاتون کی نعش کو کاغذی کاروائیوں کے بعد پوسٹ مارٹم کے لئے کمٹہ سرکاری اسپتال منتقل کیا گیا ہے،مغل احمد کو دو لڑکے اور دو لڑکیاں ہیں۔
کمٹہ پولس نے بس ڈرائیور کو گرفتار کرتے ہوئے حادثے کی چھان بین شروع کردی ہے۔
