نئی دہلی،17؍نومبر (ایس او نیوز؍ آئی این ایس انڈیا ) مرکزی سرکار جہاں ایک طرف خواتین کے تحفظ کیلئے نت نئے منصوبوں کا آغاز کر رہی ہے اور صنف نازک کے تحفظ کے نام پر سیاسی روٹی بھی سینکی جا رہی ہے، تاہم اس سمت میں ناکامی جگ ظاہر ہے ۔ اس کے کئی امثال ہیں ، ان ہی مثالوں میں سے ایک مثال یہ بھی کہ جب آئی ٹی او جیسے دہلی کی ناک کہے جانے والے علاقے میں ایک لڑکی کے ساتھ چھیڑ خانی کی گئی اور ملزم اس وقت تک گرفت سے باہر رہا جب تک کہ سی سی ٹی وی کیمروں کی مدد نہ لی گئی ۔ گرفتارشدہ ملزم کی شناخت اکھلیش 25 کے طور پر ہوئی ہے ۔ پولیس نے بتایا کہ 10 منٹ کے اندر اس نے دو لڑکیوں کے ساتھ چھیڑ خانی کی اس دوران وہ شراب کے نشہ میں بری طرح دھت تھا ۔ یہ واقعہ آئی ٹی او میٹرو اسٹیشن کے دروازے نمبر 1 کی سیڑھیوں سے نیچے اترنے کے دوران پیش آیا ۔ پولیس نے میٹرو اسٹیشن کی سیڑھیوں کے سامنے سی سی ٹی وی کیمروں کے فوٹیج سے سراغ لگا کر ملزم کو گرفتار کیا۔ اس واقعہ کے بعد مرکزی سرکار کے زیر انتظام دہلی پولیس کی ناکامی بھی ظاہر ہوتی ہے کہ حکومت کے سبز باغ دکھانے کے ساتھ ساتھ پولیس بھی تغافل کیش ہے ۔