کاروار18؍مارچ ( ایس او نیوز) لائسنس رینیو کیے بغیرریوالور رکھنے کے الزام میں سابق ریاستی وزیر اور درپیش پارلیمانی انتخاب میں جنتا دل اور کانگریس کے مشترکہ امیدوار سمجھے جانے والے آنند اسنوٹیکر اور ان کے دیگر ساتھیوں پر کیس درج کیا گیا ہے۔

پولیس کے بیان کے مطابق ہاویری ضلع کے رانی بنّور میں ماکنور چیک پوسٹ پر تلاشی کے دوران KA 05 - Mx 7777نمبر پلیٹ والی انووا کار کے اندر انگلینڈ میں تیار شدہ ایک ریوالور پایا گیا۔اس ریوالورکا لائسنس سابق وزیر آنند اسنوٹیکر کے نام پر تھا، مگر اس کی میعاد دسمبر 2018 میں ختم ہوچکی تھی۔ اور کار میں سفر کررہے دو افراد آدیش سارنگ اور روی کمارنائک اس ریوالور کو اپنے ساتھ رکھنے کے مجاز نہیں تھے۔

اس لئے لائسنس رینیو کیے بغیرغیر قانونی طور پرریوالوراپنے ساتھ لے کر کار میں سفر کرنے کے الزام میں مذکورہ دونوں افراد کے علاوہ آنند اسنوٹیکر کے خلاف بھی کمار پٹن پولیس اسٹیشن میں کیس درج کیا گیا ہے۔اس کے علاوہ کار اور ریوالور ضبط کرلیا گیا ہے۔ بتایا جاتا ہے کہ آنند اسنوٹیکرکے ساتھی داونگیرے سے رانی بنّور کی طرف سفر کررہے تھے۔