بنگلورو۔14؍نومبر(ایس او نیوز) ریاستی وزیر شہر ترقیات وحج جناب روشن بیگ نے آج ریاستی اسمبلی میں واضح کیاکہ محکمۂ شہر ی ترقیات میں کسی بھی پراجکٹ کیلئے تفصیلی پراجکٹ رپورٹ کی تیاری سے قبل کوئی ٹنڈر منظور نہیں کیاجائے گا اگر ایسا ہوا ہے تو اس سلسلے میں افسران سے رپورٹ طلب کریں گے اور ذمہ داروں کے خلاف کارروائی یقینی بنائیں گے۔ آج اس سلسلے میں وقفۂ سوالات کے دوران بی جے پی رکن سی ٹی روی کی طرف سے معاملہ اٹھائے جانے پر انہوں نے کہاکہ اس طرح کے دومعاملے حکومت کے علم میں آئے ہیں ان دونوں معاملات کا وہ بذات خود جائزہ لیں گے ، کیونکہ وہ جانتے ہیں کہ ضوابط کے مطابق تفصیلی پراجکٹ رپورٹ کے بغیر کسی بھی منصوبے کیلئے ٹنڈر جاری نہیں کیاجاسکتا ۔ انہوں نے کہاکہ اراکین اسمبلی نے چونکہ چند مخصوص معاملات کی نشاندہی کی ہے اسی لئے وہ خود ان معاملات کا جائزہ لیں گے اور خاطیوں پر کارروائی یقینی بنائیں گے۔اس سے قبل سی ٹی روی نے کہاکہ کنٹراکٹروں کی سہولت کیلئے پراجکٹ رپورٹ کی تیاری سے قبل ہی کاموں کیلئے ٹنڈر طلب کرنا عام ہوچکا ہے۔ چکمگلور کے امرت یوجنا کے کاموں کیلئے اسی طرح ٹنڈر طلب کیا گیاہے۔ انہوں نے کہاکہ چکمگلور شہر کیلئے روزانہ 32لاکھ لیٹر پانی کی ضرورت ہے، جبکہ صرف 27 لاکھ لیٹر پانی کی سربراہی کا پراجکٹ منظور کیاگیا ہے۔اپوزیشن لیڈر جگدیش شٹر نے روی کی حمایت کرتے ہوئے کہاکہ ہبلی دھارواڑ میں بھی اسی طرح پراجکٹ رپورٹ کے بغیر ٹنڈر طلب کئے گئے ہیں۔ وزیر موصوف نے دونوں اراکین کو یقین دلایا کہ ان معاملات پر وہ ان دونوں کے ساتھ تفصیلی بات چیت کریں گے اور ٹنڈر جاری کرنے کیلئے ذمہ دار افسران کی باز پرس کی جائے گی۔