پولیس سب انسپکٹرکا قابل ستائش اقدام۔ریاستی ہائی وے کے خطرناک گڈھے سے عوام کودلائی نجات
سولیا9؍اگست (ایس او نیوز)سولیا کے سمپاجے سے مڈیکیرے ، میسورو اور بنگلورو کی طرف جاتے وقت پیراجے نامی علاقے میں ریاستی ہائی وے پر ایک بہت گہرا گڈھا پڑا ہواتھاجو مقامی عوام اورموٹر سواروں کے لیے انتہائی خطرناک تھا او رجان لیوا حادثات کاسبب بننے والا تھا۔
بتایا جاتا ہے کہ اس گڈھے کو بند کرنے کے سلسلے میں متعلقہ محکمہ اور افسران کو بار باریاددہانی کیے جانے کے باوجود کوئی بھی اس طرف توجہ نہیں دے رہا تھا۔ تنگ آکر عوام کو راحت دلانے کی نیت سے سولیا پولیس اسٹیشن کے سب انسپکٹر منجو ناتھ نے خود ہی اپنے ہاتھوں میں بیلچہ اٹھالیا اور اس جان لیوا گڈھے میں سیمنٹ ،مٹی اور پتھر ڈا ل کر اسے بند کرنے کاکام پورا کرڈالا۔پولیس سب انسپکٹر کو یونیفارم میں رہتے ہوئے اپنی جیپ کے ڈرائیور کو ساتھ لے کرسڑک کا گڈھا بھرتے دیکھ کر عوام میں سے بھی ایک دو افراد آگے آئے اور انہوں نے اس کام میں ہاتھ بٹایا۔پی ایس آئی کی اس بے لو ث خدمت کا ویڈیو کلپ سوشیل میڈیا پر وائرل ہوگیا ہے اور ہر طرف سے پی ایس آئی منجوناتھ کی ستائش کی جارہی ہے۔