منڈیا سے سمالتا کو ٹکٹ دینے کے معاملے پر الجھن۔16؍مارچ کو حتمی فیصلہ متوقع
بنگلورو12؍مارچ (ایس او نیوز) فلمی دنیا سے سیاست میں آئیں آنجہانی امبریش کی بیوہ سما لتا امبریش منڈیا پارلیمانی حلقہ سے چناؤ لڑنے بے تاب ہیں ۔انہوں نے کانگریس ٹکٹ کا مطالبہ کیا ہے۔ ریاست میں کانگریس اور جے ڈی ایس کے درمیان انتخابی سمجھوتہ کے پیش نظر منڈیا کی سیٹ جے ڈی ایس کے لئے چھوڑ دی گئی ہے لیکن کانگریس ہائی کمان نے واضح کیا ہے کہ امبریش کی بیوہ سما لتا کو منڈیا سے ٹکٹ دیاجائے ۔ بی جے پی بھی اس معاملہ پر غور کررہی ہے کہ اگر کانگریس نے سمالتا کو ٹکٹ دینے سے انکار کردیا توان کی باہر سے تائید کی جائے یا پارٹی ٹکٹ دیاجانا چاہئے. اس معاملہ میں بھی کوئی واضح خبر نہیں ہے ۔
دریں اثناء آج دہلی میں کانگریس اسکریننگ کمیٹی کے اجلاس کے دوران ہائی کمان نے سمالتا کو ٹکٹ دینے کااشارہ دے کر دونوں کانگریس اور جے ڈی ایس کو الجھن میں ڈال دیاہے ۔ کیونکہ وزیراعلیٰ کمارسوامی نے اس مرتبہ منڈیاسے اپنے بیٹے نکھل کو میدان میں اتارنے کی تقریباً پوری تیاری کرلی ہے کیونکہ یہ حلقہ جے ڈی ایس کے لئے محفوظ مانا جاتا ہے ۔دریں اثناء منڈیا سیٹ کو کانگریس کے لئے محفوظ رکھنے اور اس حلقہ سے سمالتا کو میدان میں اتارنے کی کانگریس ہائی کمان نے ہدایت دے کر کانگریس کے لئے بڑی الجھن پیدا کردی ہے ۔ اس معاملہ پر کانگریس اور جے ڈی ایس کے درمیان دراڑ بھی پڑسکتی ہے۔ کانگریس ہائی کمان کی اس تجویز سے قبل سما لتا نے اعلان کیاتھا کہ وہ مجوزہ لوک سبھا چناؤ منڈیا حلقہ سے لڑیں گی یا نہیں اس کا اعلان18مارچ کو کریں گی۔ انہوں نے کہا تھا کہ آخری وقت تک کچھ بھی ہوسکتا ہے ۔باقاعدہ پارٹی کی جانب سے اعلان کرنے تک وہ مایوس نہیں ہوں گی۔انہوں نے یہ بھی کہا تھا کہ عوام افواہو ں پر توجہ نہ دیں کہ تمام کانگریس لیڈر مجھ سے منڈیا سے چناؤ نہ لڑنے دباؤ ڈال رہے ہیں ۔انہوں نے یہ اعتراف کیا کہ کانگریس کے طاقتور لیڈر ڈی کے شیوکمار نے منڈیا سے چناؤ نہ لڑنے کی درخواست کی تھی۔ انہوں نے کہا کہ کوئی بھی مجھ پر دباؤ نہیں ڈال سکتا۔انہوں نے کہا کہ ڈی کے شیوکمار نے مجھ سے ملاقات کرکے منڈیا کی بجائے کسی دوسرے حلقہ سے چناؤ لڑنے کی درخواست کی تھی۔ انہوں نے یہ بھی کہا تھا کہ کانگریس جے ڈی ایس اتحاد کو جاری رکھنے کے لئے ہمیں منڈیا کی سیٹ چھوڑ دینی ہوگی۔