پٹنہ10 مارچ ( آئی این ایس انڈیا/ایس او نیوز) ایودھیا میں رام مندر کی تعمیر کے معاملے پر بہار کے سابق وزیر صحت اور لالو پرساد کے بڑے بیٹے تیج پرتاپ یادو نے بڑا بیان دیا ہے۔ ایک پروگرام کے دوران تیج پرتاپ یادو نے اب ایودھیا میں رام مندر بنانے کی ذمہ داری لینے کی بات کہی ہے۔ انہوں نے کہا کہ ہندو، مسلم، سکھ، عیسائی، انتہائی پسماندہ، غریب، دلت تمام طبقے کے لوگ وہاں جائیں گے اور ایک ایک اینٹ رکھیں گے ، ہم رام مندر بنانے کا کام کریں گے۔ مندر جس دن بنا اس دن بی جے پی۔آر ایس ایس کا خاتمہ ہوجائے گا ۔ جب اس کے پاس مسئلہ نہیں رہے گا، تو پلیٹ بجاتے رہیں گے چمچ لے کر۔واضح ہو کہ ایودھیا میں رام مندر بنانے کو لے کر بی جے پی اکثر دعویٰ کرتی رہتی ہے۔ اتنا ہی نہیں، بی جے پی نے اپنے منشور میں بھی ایودھیا میں رام مندر کی تعمیر کی بات کو شامل کیا ہے، تاہم اب رام مندر بابری مسجد کا معاملہ سپریم کورٹ میں ہے ۔ تیج پرتاپ کا یہ بیان بہار ضمنی انتخاب کی پولنگ ہونے سے ٹھیک پہلے آیا ہے۔واضح ہو کہ بہار میں ایک لوک سبھا اور دو اسمبلی سیٹوں پر ہونے والے ضمنی انتخابات کے لئے جمعہ کو ہی انتخابی مہم ختم ہوئی ہے ۔ غور طلب ہے کہ کچھ وقت پہلے تیج پرتاپ یادو کی ایک تصویر وائرل ہوئی تھی، جس میں وہ راج مستری کے طور پر نظر آرہے ہیں ،تاہم انہوں نے ٹویٹس کے ذریعہ معاشرہ کی اقتصادیت پر چوٹ کیا تھا۔ اتنا ہی نہیں، اس سے پہلے تیج پرتاپ یادو نے سشیل کمار کے بیٹے کی شادی میں متنازعہ بیان دیا تھا۔