ایشورپا کے خلاف بی جے پی کی تادیبی کارروائی،سنگولی راینا برگیڈ کے جلسہ میں شرکت پر وجہ بتاؤ نوٹس جاری
بنگلورو۔9/دسمبر(ایس او نیوز) ریاستی بی جے پی نے ضابطہ شکنی برداشت نہ کرنے کے اپنے اعلان پر پابندی کا اظہار کرتے ہوئے سنگولی راینا برگیڈ کے جلسہ میں شرکت پر ریاستی لیجسلیٹیو کونسل کے اپوزیشن لیڈر کے ایس ایشورپا کے نام وجہ بتاؤ نوٹس جاری کردیا ہے۔ بی جے پی کی مرکزی ضابطہ کمیٹی کی طرف سے جاری کی گئی نوٹس میں ایشورپا سے کہا گیا ہے کہ پارٹی کی تنبیہہ کے باوجود انہوں نے اس برگیڈ کے جلسہ میں کیوں شرکت کی، وہ اس کی وضاحت فوراً کریں۔ نوٹس میں کہاگیا ہے کہ پارٹی کی ہدایت کو نظر ا نداز کرتے ہوئے انہوں نے سنگولی راینا برگیڈ کے جلسہ میں شرکت کی،جس کی وجہ سے پارٹی کو ندامت جھیلنی پڑ رہی ہے۔ فوری طور پر وہ اس سلسلے میں جواز پیش کریں بصورت دیگر ان کے خلاف تادیبی کارروائی ناگزیر ہوجائے گی۔ پارٹی کی قومی ضابطہ کمیٹی کے چیرمین ارون سنگھ نے اس سلسلے میں ایشورپا کو نوٹس جاری کرنے ریاستی ضابطہ کمیٹی کے چیرمین شنکرپاکو ہدایت دی ہے۔ یاد رہے کہ گزشتہ ہفتہ کرناٹک میں بی جے پی امور کے انچارج مرلی دھر راؤ نے ایشورپا کو تاکید کی تھی کہ وہ سنگولی راینا برگیڈ کی سرگرمیوں سے دور رہیں، انہوں نے مجموعی طور پر تمام بی جے پی لیڈروں سے کہاتھاکہ وہ کسی بھی ادارہ یا تنظیم کے جلسہ میں شرکت نہ کریں، کیونکہ اس سے پارٹی کا پلاٹ فارم کمزور ہوگا۔اس کی پرواہ کئے بغیر ایشورپا نے بلگاوی میں 6دسمبر کو سنگولی راینا برگیڈ کے جلسہئ عام کا اہتمام کیا۔یاد رہے کہ بلگاوی لیجسلیچر اجلاس کے دوران بھی شمالی کرناٹک کے بیشتر بی جے پی قائدین نے ریاستی بی جے پی صدر یڈیورپا سے مطالبہ کیا تھاکہ ایشورپا کے خلاف کارروائی کی جائے،کیونکہ سنگولی راینا برگیڈ اور اہندا کی آڑ میں ایشورپا پارٹی کو نقصان پہنچانے کیلئے ایک الگ ہی تنظیم بنانے کی کوشش کررہے ہیں۔ اس سے آنے والے اسمبلی انتخابات میں پارٹی کو نقصان پہنچ سکتا ہے۔ خاص طور پر پسماندہ طبقات اور دلتوں کے ووٹ پارٹی کو مل نہیں پائیں گے۔ اس سلسلے میں ایشورپا کو بارہا متنبہ کیا گیا کہ وہ سنگولی راینا برگیڈ کا کنونشن منعقد نہ کریں اور اگر کہیں کنونشن ہورہا ہے تو اس میں شرکت بھی نہ کریں، لیکن پارٹی کی ایک نہ سن کر ایشورپا نے اس کنونشن میں شرکت کی اور سنگولی راینا برگیڈ کی سرگرمیوں پر روک لگانے سے صاف انکار کردیا۔ آئندہ اس طرح کی سرگرمیوں کو بڑھاوا نہ ملے اس مقصد کے تحت بی جے پی نے ایشورپا کے نام وجہ بتاؤ نوٹس جاری کرنے کا فیصلہ کیا ہے۔