بنگلورو،31؍مئی(ایس او نیوز) ریاست میں حکمران کانگریس کی طرف سے لیجسلیٹیو کونسل چیرمین ڈی ایچ شنکر مورتی کے خلاف تحریک عدم اعتماد لائے جانے پر آج شنکر مورتی نے لاعلمی کا اظہار کیااور کہاکہ بی جے پی اور جنتادل (ایس) کی حمایت سے وہ ایوان بالا کے چیرمین منتخب ہوئے ہیں۔ کانگریس کے ساتھ بھی ان کے کوئی اختلافات نہیں ہیں، پھر بھی اچانک کانگریس کی طرف سے ان کے خلاف تحریک عدم اعتماد لانے کی پہل کی گئی ہے۔ انہوں نے کہاکہ انہیں ایوان بالا کی چیرمین شپ کانگریس کی مہربانی سے نہیں ملی ،بلکہ بی جے پی اور جنتادل (ایس) کی مفاہمت کی بدولت ملی ہے۔ ان دونوں پارٹیوں کے رہنماؤں کے درمیان بھی ایسے کوئی اختلافات نہیں ہیں کہ انہیں یہ عہدہ خالی کرناپڑے ۔انہوں نے کہاکہ کانگریس نے تحریک عدم اعتماد کے متعلق جو نوٹس کونسل سکریٹری کے پاس جمع کرائی ہے اس کا وہ ماہرین قانون کے ساتھ جائزہ لیں گے اور مناسب قدم اٹھائیں گے۔ انہوں نے کہاکہ نوٹس جمع کرائے جانے کے 14دن بعد اس معاملے پر فیصلہ لیا جائے گا۔