انڈونیشیا جانے والے طیارہ میں شوہر کی بے وفائی پر بیوی کا زبردست ہنگامہ، چینائی میں طیارے کی ہنگامی لینڈنگ
دبئی 7/نومبر (ایس او نیوز/ایجنسی) دوحہ قطر سے انڈونیشیا جانے والی قطر ایئر ویز کی پرواز میں ایک ایرانی خاتون نے مبینہ طور پر اپنے شوہر کی بے وفائی کے خلاف زبردست ہنگامہ کھڑا کردیا، مگر ان کو سمجھانے بجھانے کی سبھی تدابیر جب رائیگاں گئی تو حالات پر قابو پانے کے لئے پرواز کو ہنگامی طور پر چینائی میں اتارنا پڑا۔
میڈیا رپورٹس کے مطابق یہ واقعہ اتوار کو پیش آیا تھا۔ ایرانی خاتون، اپنے شوہر اور بیٹے کے ساتھ چھٹیاں منانے انڈونیشیا کے شہر بالی جا رہی تھی کہ دوران پرواز خاتون نے اپنے سوئے ہوئے شوہر کے فنگر پرنٹس سے اس کا موبائل فون کھول لیا اور اپنے شوہر کی بے وفائی کے ثبوت دیکھ کر خاتون خود پر قابو نہ رکھ سکیں اور جھگڑا شروع کردیا۔
شوہر کی بے وفائی پر مشتعل خاتو ن نے مبینہ طور پر اپنے شوہر سے ہاتھا پائی کی اور طیارے پر سوار ڈھائی سو سے زائد سافروں کے لیے پریشانی کا سبب بھی بنی۔
جہاز کے عملے نے بیچ بچاؤ کی بہت کوششیں کیں، لیکن جب معاملہ قابو سے باہر ہوگیاتو طیارے کو قریبی ایئرپورٹ پر اتارنا پڑا۔
جہاز سے خاتون، اس کے شوہر اوربچے کو چینائی ایئرپورٹ پر اتارنے کے بعد دوگھنٹے کی تاخیر سے طیارہ دوبارہ انڈونیشیا کے شہر بالی کے لیے پرواز کرگیا۔
ایئرپورٹ حکام نے میڈیا کو بتایا کہ ایرانی مسافروں کے پاس بھارتی ویزا نہیں تھا اس لیے انہیں حراست میں رکھا گیا اور دہلی میں ایرانی سفارتخانے سے رجوع کیا گیا، جس کے بعد انہیں پیر کی رات کوالالمپور کی پرواز سے روانہ کر دیا گیا ہے جہاں سے ایرانی خاندان کو دوحہ واپس روانہ کیا جائے گا۔
ایئرپورٹ حکام نے بتایا کہ فیملی کے خلاف کوئی ایف آر درج نہیں کی گئی ہے۔