مرکزی وزیراننت کمار ہیگڈے کیوں نہیں گئے پریش میستا کے گھر؟ احتجاجیوں کا سوال
ہوناور2؍فروری (ایس او نیوز)ایک غریب ماہی گیر خاندان کے نوجوان پریش میستا کی پراسرار موت کو دومہینوں کا عرصہ گزرچکا ہے ، لیکن اس تعلق سے احتجاج کرنے والے اب یہ سوال کرنے لگے ہیں کہ مرکزی وزیر اننت کمارہیگڈے پریش میستا کے والدین سے ملاقات کے لئے ابھی تک ان کے گھر کیوں نہیں گئے؟
لوگوں کا کہنا ہے کہ پریش میستاکی آخری رسومات والے جلوس میں شرکت کرنے کے بعد اننت کمار ہیگڈے جو کینرا لوک سبھا کےرکن پارلیمان بھی ہیں ن پھر کبھیپریش کے گھر والوں کی طرف پلٹ کر نہیں دیکھا اور نہ ہی ان کی تعزیت کے لئے پہنچے۔ جبکہ ایم ایل اے شاردا شیٹی نے دستاویزات کے ساتھ بتایا ہے کہ ریاستی حکومت نے پریش کی موت کے سلسلے میں سی بی آئی سے تحقیقات کروانے کا فیصلہ کیا ہے، لیکن مرکزی حکومت کی طرف سے اس کی اجازت دینا ضروری ہے۔لوگوں نے پوچھا ہے کہ آخر پریش کی موت کی تحقیقات کے سلسلے میں وزیر اننت کمار ہیگڈے کوئی دلچسپی کیوں نہیں دکھا رہے ہیں؟جبکہ منگلورو میں ہلاک ہونے والے دیپک راؤ کے گھر والوں سے وزیر موصوف نے خود جاکر ملاقات کی اور تعزیت کرتے ہوئے مالی تعاون بھی دیا ۔ اس کے علاوہ مقتول کے بھائی کو ملازمت دلانے تک کا بھی وعدہ کیا ہے لیکن انہوں نے اپنے ہی علاقے میں موجودپریش میستا کے گھروالوں سے ملنا اور تعزیت کرنا ضروری نہیں سمجھا ۔دوسری طرف منگلورو کے رکن پارلیمان نلین کمار کٹیل نے ہوناور پہنچ کر پریش میستا کے گھر والوں سے تعزیت کی تھی۔
لوگ مرکزی وزیر کے اس رویے پر حیران ہیں کہ مرنے والے دونوں نوجوان’ ہند و ‘ہونے کے باوجود ہندوتواوادی عزائم کے چمپیئن نے آخر دوہرا پیمانہ کیوں اپنایا ہے اور اس کے پیچھے آخر کونسا راز چھپا ہے!
چونکہ 3فروری کو ہوناور کے ایس ڈی ایم کالج میں اپنی وزارت کے تحت منعقدہ ’روزگار میلہ‘ میں شرکت کے لئے وزیر اننت کمار ہیگڈے ہوناور آنے والے ہیں،اس پس منظر میں عوام توقع کررہے ہیں کہ شاید اس باروہ پریش میستا کے گھر والوں سے ملنے کے لئے کچھ وقت نکالیں گے۔دیکھنا یہ ہے کہ عوام کی یہ توقع اب کی بارپوری ہوتی بھی ہے یا نہیں۔