نئی دہلی،25؍اپریل (ایس او نیوز؍آئی این ایس انڈیا )اب وہا ٹس ایپ پر غلط خبر شیئر کی تو جیل کی ہوا کھانا پڑ سکتی ہے۔اتر پردیش پولیس نے سوشل میڈیا اور وہاٹس ایپ گروپوں پر گمراہ کن خبریں پھیلانے اور افواہوں پر لگام لگانے کے لیے ایک بڑا اعلان کیا ہے۔وارانسی کے ڈی ایم اور ایس ایس پی نے ایک مشترکہ ہدایت جاری کرتے ہوئے کہا ہے کہ سوشل میڈیا اور وہاٹس ایپ پر گروپ چلانے والے ایڈمن ہوشیار رہیں، ان کے گروپ میں کسی بھی گمراہ کن، غلط حقائق سے بھری یا افواہ پھیلانے والی پوسٹ پائے جانے پر متعلقہ شخص کے ساتھ ہی گروپ ایڈمن پر ایف آئی آر درج کی جائے گی۔وارانسی کے ڈی ایم یوگیشور رام مشرا اور ایس ایس پی نتن تیواری کی طرف سے 19؍اپریل کو جاری ہدایت میں کہا گیا ہے کہ سوشل میڈیا پر اظہار رائے کی آزادی انتہائی اہم ہے اور آزادی کے ساتھ ہی ذمہ داری بھی ضروری ہے۔عام طور پر سوشل میڈیا پر خبروں کے نام سے بنے گروپ اور دیگر نام سے بنے گروپ میں کبھی ایسے خبریں یا حقائق بھی شیئر کئے جا رہے ہیں، جن کی سچائی ثابت نہیں ہے، یہ میسج بغیر تصدیق کے براہ راست کٹ پیسٹ یا فارورڈ کردئیے جا رہے ہیں۔گروپ کے ایک رکن کی غلط بیانی، بغیر تصدیق کے خبریں جو افواہ یا سماجی ہم آہنگی کو بگاڑنے والے پوسٹ پر گروپ ایڈمن کو فوری طور اس کی تردید کر کے اس رکن کو گروپ سے ہٹانا چاہیے ۔