کولکاتہ،18؍اگست(ایس او نیوز؍آئی این ایس انڈیا ) کیرل میں آئے تباہ کن سیلاب کی وجہ سے سینکڑوں لوگوں کی جان چلی گئی ہے جبکہ لاکھوں لوگ اس کی زد میں ہیں ۔ ہفتہ کی صبح مغربی بنگال کی وزیر اعلیٰ ممتا بنرجی نے ان لوگوں کے لئے ہمدردی کا اظہار کرتے ہوئے پراتھنا کی ہے ۔

انہوں نے ٹوئٹ کر کے لکھا کہ کیرل میں ہوئی تباہی کو بیان کرنے کے لئے الفاظ نہیں ہے ۔ میں یہاں کے بھائیوں اور بہنوں کے لئے دعا کرتی ہوں۔ ممتا نے لکھا کہ پورا ملک آپ کے ساتھ کھڑا ہے جو لوگ اس سیلاب میں پھنسے ہیں وہ مضبوطی سے اس کا مقابلہ کریں ۔ وزیر اعلیٰ نے سیلاب کی زد میں آنے سے مرنے والے لوگوں کے تئیں خراج عقیدت پیش کرتے ہوئے ان کے رشتہ داروں اور بہی خواہوں کو تسلی دی ہے ۔

کیرل میں مسلسل ہو رہی بارش کی وجہ سے آئے زبر دست تباہ کن سیلاب میں 247لوگوں کی موت ہو چکی ہے جبکہ 2.11لاکھ لوگ اس کی زد میں آکر متاثر ہیں۔32500ہیکٹیئر زمین پرلگی فصلیں پوری طرح سے بر باد ہو گئی ہیں۔ مرکز ی ڈیزاسٹر مینجمنٹ محکمہ کے علاوہ فوج کو راحت اور بچاؤ کے کام میں لگایا گیا ہے ۔ جمعہ کی شام وزیر اعظم نریندر مودی نے بھی کیرل کا دورہ کر کے حالات کا جائزہ لیا ہے ۔