بھاجپا لیڈر کی گھناؤنی سازش بے نقاب ، اپنی بیٹی کے اغوا کی سازش خودرچی، پھر ترنمول کانگریس پر لگایا الزام
کولکاتہ، 18 فروری(ایس او نیوز؍آئی این ایس انڈیا) مغربی بنگال کے بیربھوم ضلع میں ایک مقامی بی جے پی لیڈرسوپربھات بٹوال کو اپنی بیٹی کے اغوا کے سلسلے میں اتوار کو گرفتار کیا گیا۔اس کیس میں دو دیگر لوگوں کو بھی گرفتار کیا گیا ہے
۔ ایک سینئر پولیس افسر نے بتایا کہ بی جے پی لیڈرسوپربھات بٹوال کی بیٹی کو جمعرات کو بندوق کے نوک پر اغوا کر لیا گیا تھا، اسے شمالی دیناجپور ضلع سے ’بازیاب‘ کرایا گیا۔ افسر نے بتایا کہ اتر دیناجپور پولیس کے ساتھ ایک مشترکہ مہم میں بیربھوم کی ایک پولیس ٹیم نے 22 سال کی لڑکی کو اتوار کی صبح دال کولا ریلوے اسٹیشن علاقے سے برآمد کیا۔انہوں نے کہا کہ بی جے پی لیڈرسوپربھات بٹوال اور ان کے دو ساتھیوں کو اس وقت گرفتار کیا گیا جب ابتدائی تحقیقات میں اشارہ ملا تھا کہ اغوا میں اس کا بھی ’رول ‘ہے۔
بیربھوم ضلع کے پولیس سپرنٹنڈنٹ شیام سنگھ نے بتایا کہ ہم نے آج صبح دال کولا سے لڑکی کو چھڑایا ہے ، وہ ٹھیک ہے اور ہم یہ پتہ لگانے کے لئے اس سے بات کر رہے ہیں کہ اصل میں ہوا کیا تھا۔ ہم نے لڑکی کے والد کو بھی گرفتار کر لیا ہے، کیونکہ ہمیں لگتا ہے کہ اس نے اغوا میں اہم ’کردار‘ ادا کیا ہے۔اغوا کے پس پردہ حقائق کے بارے میں پوچھنے پر سنگھ نے کہا کہ اس کے دو پہلو ہیں۔ ایک تو خاندانی مسئلہ ہے اور دوسرا یہ بھی ہے کہ سیاسی مفادات بھی اس سے وابستہ تھا ۔ہم معاملے کی تحقیقات کر رہے ہیں۔ ہم تینوں سے پوچھ گچھ کر رہے ہیں۔ ضلع پولیس کے ایک ذرائع نے بتایا کہ تقریبا پانچ ماہ پہلے ترنمول کانگریس چھوڑ کر بی جے پی میں شامل ہوئے سو پربھات بٹوال کو ہفتہ کی رات حراست میں لیا گیا تھا۔ اس سے پوچھ گچھ کے بعد پولیس کو ان کی بیٹی کے ٹھکانے کے بارے میں پتہ چلا۔ترنمول کانگریس میں شامل ہونے سے پہلے بٹوال سی پی ایم کی ضلع کمیٹی کا رکن تھا۔ اس کی بیٹی کے اغوا کے بعد لابھ پور میں صورتحال کشیدہ بن گئی تھی۔ مظاہرین نے تین دن سے سوری۔کٹوا روڈ جام کر رکھا تھا۔ ہفتہ کو ایک مشتعل ہجوم نے ترنمول کانگریس کے مقامی ممبر اسمبلی منیرالاسلام کی گاڑی پر حملہ کیا جس کی وجہ سے انہیں مقامی پولیس تھانے میں پناہ لینی پڑی۔ پولیس کو بھیڑ کو منتشر کرنے کے لئے لاٹھی چارج کرنا پڑا۔ بی جے پی کی ضلعی قیادت نے الزام لگایا تھا کہ اس اغوا کے پیچھے’ترنمول کانگریس کے حمایت یافتہ غنڈوں کا ہاتھ ‘ ہے ۔لیکن بعدازاں حقیقت کا پردہ فاش ہوگیا کہ بی جے پی لیڈرسوپربھات بٹوال خود اپنی بیٹی کے اغوا میں اہم رول ادا کررہا تھا ۔