ہماری توجہ آسٹریلیا کی ٹیم پر نہیں ہے، یہی ہماری ٹیم کی سب سے بڑی مضبوطی ہے:کوہلی
پونے ؍نئی دہلی،22فروری(ایس او نیوز؍آئی این ایس انڈیا)ہندوستانی کرکٹ ٹیم پونے میں آسٹریلیا کے ساتھ 4ٹیسٹ میچوں کی سیریز سے پہلے ٹیسٹ کے لئے پریکٹس میں لگی ہوئی ہے۔ٹیم کے پریکٹس سیشن میں کوچ انیل کمبلے اور کوہلی کھلاڑیوں سے قریب سے بات کرتے دیکھے گئے۔آسٹریلیا کے خلاف23فروری سے شروع ہو رہی ہے چار ٹیسٹ میچوں کی سیریز وراٹ کے لئے بہت مواقع لے کر آ رہی ہے۔پچھلی چارمسلسل سیریز میں چار ڈبل سنچری کے ساتھ زبردست فارم میں چل رہے وراٹ اب ماسٹر بلاسٹر سچن تندولکر کو پیچھے چھوڑسکتے ہیں۔کوہلی نے اس موقع پر میڈیا سے بات چیت میں کہا کہ آسٹریلیا کے ساتھ ٹیسٹ سیریز کھیلنے سے پہلے ٹیم انڈیاپونے میں پریکٹس پرپوری توجہ دے رہی ہے،ہماری توجہ آسٹریلیا کی ٹیم پر نہیں ہے اور یہی ہماری ٹیم کی سب سے بڑی مضبوطی ہے۔کوہلی نے کہاکہ ہر ایک میچ چیلنج ہے، ہر سیریز چیلنجوں سے بھری ہے،ہر ٹیم کی کچھ خصوصیات ہے اور تمام دوسری ٹیمیں مضبوط ہیں۔کپتانی ٹیم پر انحصار کرتی ہے، کپتان کی کامیابی ٹیم کی کارکردگی سے طے ہوتی ہے۔کوہلی نے کہا کہ میں ہرسیریز کے بعد خود کو جج نہیں کرتا ہوں، میری ترجیح اور مقصد اپنے ملک کے لیے کھیلنا اور جیتنا ہے ۔22سال کی عمر میں مجھ میں35سال کے تجربہ کار کھلاڑی کو ڈھونڈا جاتا تھا۔اس موقع پر وراٹ کوہلی نے آسٹریلوی فاسٹ گیندباز مچل سٹارک کی بھی تعریف کی۔ کوہلی نے کہا سٹارک عالمی بولر ہیں، ان کی بولنگ شاندار ہے،وہ اپنے کھیل کو بہتر سطح پر لے آئے ہیں۔واضح رہے کہ اس سے قبل آسٹریلیا کے سابق کپتان ا سٹیو وا نے بھی مچل سٹارک کی تعریف کی تھی۔ انہوں نے کہاتھاکہ اس وقت اسٹارک دنیا کے نمبر ون بالر ہیں۔انہیں اگرٹیم میں کسی ایک بالر کو منتخب کرنے کو کہا جائے تو وہ یقینی طور پرا سٹارک کومنتخب کریں گے۔
