نئی دہلی13 اکتوبر (ایس او نیوز؍آئی این ایس انڈیا) آپ چاہتے ہیں کہ ملک میں سب کو سبزی خور بننے کے لئے کہا جائے؟ ہم ایسا حکم نہیں دے سکتے۔گوشت اور چمڑے کی برآمدات روکنے کا مطالبہ کرنے والی عرضی پر سماعت کرتے ہوئے سپریم کورٹ نے یہ تبصرہ کیا ہے۔درخواست گزار این جی اوکی دلیل یہ تھی کہ گوشت اور چمڑے کی برآمدات کا کاروبار بیدردی سے بھرا ہوا ہے۔ اسے مرکز اور ریاستی حکومتیں فروغ دے رہی ہیں۔ انہیں ایسا کرنے سے روکا جانا چاہئے۔اس پر جسٹس مدن بی لوکر اور جسٹس دیپک گپتا کے بنچ نے درخواست گزار کے وکیل سے سوال کیا کہ کیا وہ چاہتا ہے کہ ملک میں ہر شخص سبزی خور بن جائے۔ وکیل کا جواب تھا کہ اس کی درخواست بھارت کے باہر گوشت کی برآمدات کو لے کر ایکسپورٹ سے متعلق ہے ۔ تاہم درخواست گزار کے وکیل کے بار بار اصرار کرنے پر معاملہ مسترد نہیں کیا۔ وکیل کا کہنا تھا کہ انہیں اپنی بات رکھنے کا موقع ملنا چاہئے۔ اس پر عدالت نے سماعت فروری تک کے لئے ٹال دی۔ کورٹ نے ابھی تک اس مسئلے پر حکومت کو نوٹس جاری نہیں کیا ہے۔