بنگلورو،16؍جولائی(ایس او نیوز )ریاستی وزیر اعلیٰ ایچ ڈی کمار سوامی نے کہا ہے کہ بچوں کا تحفظ اور بچوں پر ہو رہے ظلم اور زیادتیوں کے معاملات نہایت ہی اہمیت کے حامل ہیں اور ریاستی حکومت بچوں کے تحفظ کے معاملہ کو زیادہ اہمیت دینے کے سلسلہ میں کار بند ہے۔
نوبل انعام یافتہ،’’بچپن بچاؤ تحریک ‘‘نامی رضاکار تنظیم کے بانی، حقوق اطفال کے لئے سرگرم رضاکار کیلاش ستیارتھی نے کل گذشتہ ریاستی وزیر اعلیٰ ایچ ڈی کمار سوامی سے ملاقات کی تھی، اس موقع پر کیلاش ستیارتھی نے وزیر اعلیٰ کو یقین دلایا کہ ریاست میں بچوں کے تحفظ اور حقوق اطفال سے متعلق معاملات میں وہ کرناٹک حکومت کے ساتھ تعاون کرنے بلکہ مل کر کام کرنے کے لئے تیار ہیں۔ستیارتھی نے اس رائے کا اظہار کیا کہ حقوق اطفال اور بچوں کے تحفظ سے متعلق پالیسی کی تیاری کے ذریعہ سیاست کو ایک انسانیت نواز رخ فراہم کیا جا سکتا ہے ۔
اس موقع پر حقوق اطفال کو اہمیت دینے، اضلاع کی سطح پر حقوق اطفال کمیٹیوں کو مضبوطی فراہم کرنے اور بچوں کے تحفظ سے متعلق تنفیذی دستوں کے قیام وغیرہ امور پر تبادلہ خیال کیا گیا۔ریاستی حکومت کے چیف سکریٹری ٹی ایم وجے بھاسکر اور وزیر اعلیٰ کے خصوصی مشیر سیلوا کمار بھی موجود رہے۔